சண்டிகர் : ஹரியானா மாநிலத்தில் அதிர்ச்சியை ஏற்படுத்தும் வகையில், மூத்த ஐபிஎஸ் அதிகாரியும் ஏடிஜிபி பதவியில் இருந்த பூரன் குமார் துப்பாக்கியால் சுட்டு தற்கொலை செய்துக் கொண்டார்.
2001-ம் ஆண்டு பேட்சை சேர்ந்த பூரன் குமார், தற்போது ஹரியானா போலீஸ் பயிற்சி மையத்தில் ஏடிஜிபி ஆக பணியாற்றி வந்தார். இன்று மதியம் சுமார் 1.30 மணியளவில், தன் துப்பாக்கியால் தன்னைத்தானே சுட்டு உயிரிழந்ததாக தகவல் வெளியாகியுள்ளது.
இச்சம்பவம் தொடர்பாக காரணம் உடனடியாக வெளிவரவில்லை. பூரன் குமாரின் மனைவி அமன், தற்போது ஜப்பான் அரசு முறை பயணத்தில் உள்ள ஐஏஎஸ் அதிகாரி என தெரியவந்துள்ளது. கணவர் மரண செய்தி அறிந்ததும், அவர் நாளை இந்தியா திரும்பவுள்ளதாக கூறப்படுகிறது.
சம்பவ இடத்தில் தடயவியல் நிபுணர்கள் மற்றும் போலீசார் விரிவான விசாரணை நடத்தி வருகின்றனர். சம்பவம் தொடர்பாக வழக்கு பதிவு செய்யப்பட்டு, தற்கொலையின் காரணம் குறித்து போலீசார் தீவிரமாக விசாரித்து வருகின்றனர்.
