நாமக்கல் மாவட்டம் ராசிபுரத்தில் உள்ள வநேத்ரா குழுமத்தின் புகழ்மிக்க முத்தாயம்மாள் கல்வி நிறுவனங்களில், தமிழர்களின் பாரம்பரியப் பெருமிதமான தைப்பொங்கல் திருவிழா கலைநிகழ்ச்சிகள் மற்றும் வீர விளையாட்டுக்களுடன் மிகக் கோலாகலமாகக் கொண்டாடப்பட்டது. முத்தாயம்மாள் கலை அறிவியல் கல்லூரி, பாலிடெக்னிக் இன்ஸ்டிடியூசன் மற்றும் கல்வியியல் கல்லூரி ஆகிய மூன்று நிறுவனங்களின் சார்பில் தனித்தனியாக ஏற்பாடு செய்யப்பட்டிருந்த இந்த விழாவிற்கு, கல்வி நிறுவனங்களின் செயலர் ஆர். முத்துவேல் தலைமை தாங்கி, பொங்கல் கொண்டாட்டங்களைத் தொடங்கி வைத்தார். கல்லூரிகளின் முதல்வர்கள் எஸ்.பி. விஜய்குமார், மா. மருதை, ஆர். மணி மற்றும் கலை அறிவியல் கல்லூரியின் துணை முதல்வர் ஆ. ஸ்டெல்லா பேபி ஆகியோர் முன்னிலை வகித்து, மாணவர்களுக்குப் பண்பாட்டு விழுமியங்கள் குறித்து வாழ்த்துரை வழங்கினர்.
இந்த விழாவிற்குச் சிறப்பு விருந்தினராக நாமக்கல் மாவட்ட முதன்மை கல்வி அலுவலர் ஏ.எஸ். எழிலரசி மற்றும் பள்ளிக் கல்வித்துறை அலுவலர் சு. கிருஷ்ணமூர்த்தி ஆகியோர் கலந்துகொண்டு சிறப்பித்தனர். விழாவில் பேசிய முதன்மை கல்வி அலுவலர், இன்றைய நவீனக் கல்விச் சூழலில் மாணவர்கள் நமது பாரம்பரியக் கலைகளையும், உழவின் மேன்மையையும் போற்றும் இத்தகைய விழாக்கள் அவசியம் என்று பாராட்டினார். கல்லூரி வளாகம் முழுவதும் தோரணங்கள், கரும்பு மற்றும் மஞ்சள் கொத்துகளால் அலங்கரிக்கப்பட்டு, கிராமிய மணத்துடன் காட்சியளித்தது. மாணவ, மாணவியர் அந்தந்தத் துறைகளின் வாரியாகப் பிரிந்து, புதுப்பானைகளில் அரிசியிட்டு “பொங்கலோ பொங்கல்” என முழக்கமிட்டுப் பொங்கல் வைத்தனர். மேலும், தமிழர்களின் வழிபாட்டு மரபான முளைப்பாரி எடுத்து வரும் நிகழ்வு விழாவிற்குப் புனிதத்தையும் மெருகையும் சேர்த்தது.
மாணவர்களின் கலைத்திறனை வெளிப்படுத்தும் விதமாகப் பறை இசை முழக்கம், சிலம்பாட்டம், கும்மி நடனம் போன்ற கிராமியக் கலை நிகழ்ச்சிகள் அரங்கேற்றப்பட்டன. தாரை தப்பட்டை முழங்க மாணவர்கள் ஆடிய ஆட்டம் பார்வையாளர்களை வெகுவாகக் கவர்ந்தது. இதனைத் தொடர்ந்து, தமிழர்களின் பாரம்பரிய விளையாட்டுக்களான கபடி, விறுவிறுப்பான கயிறு இழுத்தல், பானை உடைத்தல், இசை நாற்காலி மற்றும் வேடிக்கையான முறுக்கு கடித்தல் போன்ற போட்டிகள் நடத்தப்பட்டன. இப்போட்டிகளில் வெற்றி பெற்ற மாணவ, மாணவியருக்கு மாவட்ட முதன்மை கல்வி அலுவலர் மற்றும் கல்லூரிச் செயலர் ஆகியோர் பரிசுகளை வழங்கிப் பாராட்டினர். பேராசிரியர்கள், துறைத் தலைவர்கள் மற்றும் அலுவலகப் பணியாளர்கள் என அனைவரும் தங்களது பணிச்சுமையை மறந்து பாரம்பரிய உடையில் மாணவர்களுடன் இணைந்து பொங்கல் விழாவைக் கொண்டாடி மகிழ்ந்தனர்.