தஞ்சை மாவட்டம் ஒரத்தநாடு அருகே உள்ள திருமங்கலக்கோட்டை கீழையூரில், பள்ளியில் படித்த இடத்தை மறக்காமல், முன்னாள் மாணவர் ஒருவர் தனது சொந்த நிலத்தை பள்ளிக்காக தானமாக வழங்கிய சம்பவம் அனைவரையும் நெகிழ்ச்சியடைய வைத்துள்ளது.
சுமார் எழுபது ஆண்டுகளுக்கு முன்பு, அந்த ஊரின் தொடக்கப் பள்ளியில் கல்வி கற்றவர் கோவிந்தராஜ். பின்னர் உயர் கல்விக்காகவும் தொழில் நிமித்தமாகவும் வெளிநாடுகளுக்குச் சென்று, தற்போது சிங்கப்பூரில் வெற்றிகரமாகத் தொழில் செய்து வருகிறார்.
தான் படித்த பள்ளியின் நிலைமையை அறிந்த கோவிந்தராஜ், உதவி செய்ய முன்வந்தார். 2020ஆம் ஆண்டு மேல்நிலைப் பள்ளியாக தரம் உயர்த்தப்பட்டாலும், இட வசதி குறைவால் மாணவர் சேர்க்கை அதிகரிக்க முடியாமல் இருந்தது. தற்போது 250க்கும் மேற்பட்ட மாணவர்கள் பயிலும் நிலையில், கூடுதல் நிலப்பரப்பு தேவை ஏற்பட்டிருந்தது.
இந்த சிக்கலைத் தீர்க்கும் வகையில், ஊரின் மையப்பகுதியில் தன்னுடைய 30,000 சதுர அடி நிலத்தை பள்ளிக்காக தாராளமாக வழங்கினார். இதன் சந்தை மதிப்பு சுமார் ₹2 கோடி என மதிப்பிடப்படுகிறது. கடந்த ஆகஸ்ட் 8ஆம் தேதி, அந்த நிலம் பள்ளிக் கல்வித் துறை நிர்வாகத்தின் பெயருக்கு முறையாக பத்திரப் பதிவு செய்யப்பட்டது.
இது குறித்து கோவிந்தராஜ் தெரிவித்ததாவது:
“ஒவ்வொரு மனிதனின் வளர்ச்சிக்கும் அடிப்படை கல்விதான். அந்த கல்வி அனைவருக்கும் தடையின்றி கிடைக்க வேண்டும் என்பதற்காக, என் நிலத்தை பள்ளிக்குத் தானமாக வழங்கினேன். அனைவரும் தங்கள் ஊருக்கும் பள்ளிகளுக்கும் தேவையான உதவிகளைச் செய்ய வேண்டும்” என்றார்.
கோவிந்தராஜின் இந்த தன்னலமற்ற செயல், அப்பகுதி பொதுமக்கள், கல்வி வளர்ச்சி குழுவினர், அரசு பள்ளி நிர்வாகம் மற்றும் சமூக ஆர்வலர்களால் பெரிதும் பாராட்டப்பட்டுள்ளது.
