தமிழகம் முழுவதும் உள்ள நீதிமன்றங்களில் வழக்கு ஆவணங்களை இணைய வழியில் சமர்ப்பிக்கும் ‘இ-ஃபைலிங்’ முறையை சென்னை உயர்நீதிமன்றம் கட்டாயமாக்கி வருகிறது. காகிதப் பயன்பாட்டைக் குறைக்கவும், நீதித்துறை நிர்வாகத்தை நவீனப்படுத்தவும் கொண்டு வரப்பட்ட இந்தத் திட்டத்திற்கு, போதிய உட்கட்டமைப்பு வசதிகள் இல்லை எனக் கூறி வழக்கறிஞர்கள் தொடர் எதிர்ப்பு தெரிவித்து வருகின்றனர். இதன் ஒரு பகுதியாக, புதுக்கோட்டை மாவட்ட வழக்கறிஞர்கள் சங்கம் சார்பில், இ-ஃபைலிங் முறையை உடனடியாக வாபஸ் பெற வலியுறுத்தி நீதிமன்றப் புறக்கணிப்பு மற்றும் உண்ணாவிரதப் போராட்டம் நடைபெற்றது. போராட்டத்தின் உச்சகட்டமாக, இந்த டிஜிட்டல் முறையைக் கண்டிக்கும் விதமாகப் பழைய கணினிகளைச் சாலையில் போட்டு உடைத்து வழக்கறிஞர்கள் தங்களது எதிர்ப்பைப் பதிவு செய்தனர்.
புதுக்கோட்டை வழக்கறிஞர் சங்கத் தலைவர் எஸ். முத்தையன் தலைமையில் நடைபெற்ற இந்தப் போராட்டத்திற்குச் செயலாளர் ரமேஷ், பொருளாளர் பாரூக் அலி மற்றும் துணைத் தலைவர்கள் முன்னிலை வகித்தனர். இந்தப் போராட்டத்தில் மூத்த வழக்கறிஞர்கள் சந்திரசேகரன், ஏ. ரவிச்சந்திரன் உள்ளிட்ட ஏராளமான ஆண் மற்றும் பெண் வழக்கறிஞர்கள் கலந்துகொண்டு, இ-ஃபைலிங் முறைக்கு எதிராகக் கண்டன முழக்கங்களை எழுப்பினர். “கிராமப்புற வழக்கறிஞர்களுக்கும், மூத்த வழக்கறிஞர்களுக்கும் இந்த இணைய வழி நடைமுறை மிகுந்த சிரமத்தை ஏற்படுத்துகிறது; நீதிமன்றங்களில் இதற்கான உரியக் கணினி மையங்களோ அல்லது போதிய இணைய வசதிகளோ மேம்படுத்தப்படாத நிலையில், இந்தத் திட்டத்தைக் கட்டாயமாக்குவது நீதியைத் தாமதப்படுத்தும் செயல்” எனப் போராட்டக்காரர்கள் குற்றம் சாட்டினர்.
தமிழகம் முழுவதும் வழக்கறிஞர்கள் இ-ஃபைலிங் முறையை எதிர்த்து அறவழிப் போராட்டங்களை நடத்தி வரும் சூழலில், புதுக்கோட்டையில் கணினியை உடைத்து நடத்தப்பட்ட இந்த நூதனப் போராட்டம் சமூக வலைதளங்களில் விவாதங்களை உருவாக்கியுள்ளது. ஒருபுறம் தொழில்நுட்ப வளர்ச்சி அவசியம் என்று வாதிடப்பட்டாலும், மறுபுறம் அனைத்துத் தரப்பு வழக்கறிஞர்களுக்கும் சமமான வாய்ப்பையும் வசதியையும் ஏற்படுத்திக் கொடுத்த பின்னரே இத்தகைய மாற்றங்களைக் கொண்டு வர வேண்டும் என்பதே இவர்களின் பிரதான கோரிக்கையாக உள்ளது. வழக்கறிஞர்களின் இந்தத் தொடர் போராட்டத்தால் கடந்த சில நாட்களாக நீதிமன்றப் பணிகள் பாதிக்கப்பட்டுள்ளதோடு, வழக்காடிகளும் பெரும் சிரமத்திற்கு உள்ளாகியுள்ளனர்.