தமிழகத்தின் வீர விளையாட்டான ஜல்லிக்கட்டுப் போட்டிகள் தைத் திருநாளை முன்னிட்டு மதுரை மாவட்டத்தில் கோலாகலமாகத் தொடங்கவுள்ளன. ஜனவரி 15-ஆம் தேதி அவனியாபுரத்திலும், ஜனவரி 16-ஆம் தேதி பாலமேட்டிலும், ஜனவரி 17-ஆம் தேதி அலங்காநல்லூரிலும் இந்தப் போட்டிகள் நடைபெற உள்ளன. இதனை முன்னிட்டு, போட்டிகளில் பங்கேற்கும் காளைகளுக்கான உடல் தகுதி மற்றும் மருத்துவப் பரிசோதனை முகாம்கள் அந்தந்தப் பகுதிகளில் நேற்று முதல் தொடங்கி விறுவிறுப்பாக நடைபெற்று வருகின்றன. மதுரை மாவட்ட ஆட்சியரின் உத்தரவின் பேரில், கால்நடை பராமரிப்புத் துறை சார்பில் அமைக்கப்பட்ட மருத்துவக் குழுவினர் காளைகளைத் தீவிரமாகப் பரிசோதித்து வருகின்றனர்.
அவனியாபுரம் கால்நடை மருத்துவமனையில் மூத்த கால்நடை மருத்துவர் பாபு தலைமையிலான குழுவினர் காளைகளைப் பரிசோதனை செய்தனர். இதில் பங்கேற்கும் காளைகள் கண்டிப்பாக நாட்டு இனத்தைச் சேர்ந்தவையாக இருக்க வேண்டும் என்பதுடன், 2 முதல் 8 வயதிற்கு உட்பட்டதாகவும், குறைந்தபட்சம் 120 சென்டிமீட்டர் உயரமும் கொண்டிருக்க வேண்டும். மேலும், காளைகளுக்குத் தெளிவான கண் பார்வை இருப்பதையும், கால்களில் காயம் ஏதுமின்றி ஆரோக்கியமாக இருப்பதையும் உறுதி செய்தனர். குறிப்பாக, போட்டியில் பங்கேற்கக் காளைகளுக்கு நான்கு பற்கள் முளைத்திருக்க வேண்டும் மற்றும் காணை தடுப்பூசி (கோமாரி நோய்) செலுத்தப்பட்டிருக்க வேண்டும் என்பது போன்ற கடுமையான விதிமுறைகள் பின்பற்றப்படுகின்றன. அதேபோல், பாலமேடு பகுதியில் டாக்டர் தங்கபாண்டியன் தலைமையிலான குழுவினர் காளைகளின் திமில், கூர்மையற்ற கொம்புகள் மற்றும் உடல் வலிமை ஆகியவற்றை ஆய்வு செய்தனர்.
இந்த மருத்துவப் பரிசோதனையின் போது காளையின் உரிமையாளர் மற்றும் காளையைத் தழுவும் வீரர்களுடன் வரும் உதவியாளரின் ஆதார் அட்டை நகல்கள் சமர்ப்பிக்கப்பட்டன. இவை அனைத்தும் சரியாக இருக்கும் பட்சத்தில், காளையின் புகைப்படத்துடன் கூடிய தகுதிச் சான்றிதழ் வழங்கப்படுகிறது. இந்தச் சான்றிதழைப் பெற்ற உரிமையாளர்களுக்கு மட்டுமே போட்டியில் பங்கேற்பதற்கான இறுதி அனுமதிச் சீட்டு (Pass) ஆன்லைன் மூலமாக வழங்கப்பட உள்ளது. நோய்வாய்ப்பட்ட அல்லது உடல் மெலிந்த நிலையில் இருக்கும் காளைகள் போட்டிக்குத் தகுதியற்றவையாக அறிவிக்கப்பட்டுத் திருப்பி அனுப்பப்பட்டன. மதுரை மாவட்டமே இந்த வீர விளையாட்டை வரவேற்கத் தயாராகி வரும் நிலையில், மருத்துவப் பரிசோதனை முகாம்களில் காளைகளுடன் ஆர்வமாகத் திரண்டிருந்த உரிமையாளர்களால் அந்தப் பகுதியே விழாக்கோலம் பூண்டிருந்தது.
