தேனி அருகே எண்ணெய் மில்லில் பட்டப்பகலில் துணிகரம் –
தேனி பைபாஸ் சாலையில் இயங்கி வரும் எண்ணெய் மில் ஒன்றில், மர்ம நபர்கள் புகுந்து விலை உயர்ந்த எந்திர உதிரிபாகங்கள் மற்றும் பூஜை பொருட்களைத் திருடிச் சென்ற சம்பவம் அப்பகுதியில் பரபரப்பை ஏற்படுத்தியுள்ளது.
தேனி அல்லிநகரம் வெங்கலா நகர் பகுதியைச் சேர்ந்தவர் ரமேஷ் (32). இவர் தேனி பைபாஸ் சாலையில் “இலவம் பஞ்சு விதை மற்றும் தீப எண்ணெய்” உற்பத்தி செய்யும் மில் ஒன்றை நடத்தி வருகிறார். நேற்று (வியாழக்கிழமை) மில்லுக்கு விடுமுறை அளிக்கப்பட்டிருந்த நிலையில், மதியம் 12 மணி வரை மில்லிலேயே இருந்த ரமேஷ், அதன் பின்னர் மில்லை பூட்டிவிட்டு வீட்டிற்கு சென்றுள்ளார்.
இதனை நோட்டமிட்ட இரண்டு இளைஞர்கள், மதியம் சுமார் 1.45 மணியளவில் பூட்டப்பட்டிருந்த மில்லின் உள்ளே ஏறி குதித்து புகுந்துள்ளனர். அங்கிருந்த விலை உயர்ந்த எந்திர உதிரிபாகங்கள் மற்றும் பூஜை பொருட்களை திருடிக்கொண்டு அவர்கள் தப்பியோடியுள்ளனர்.
இந்த சம்பவம் குறித்து ரமேஷ் இன்று அல்லிநகரம் காவல் நிலையத்தில் புகார் அளித்துள்ளார். அதில், சுமார் இரண்டு லட்சம் ரூபாய் மதிப்பிலான எந்திர உதிரிபாகங்களை மர்ம நபர்கள் திருடிச் சென்றதாக குறிப்பிடப்பட்டுள்ளது. புகாரின் பேரில் வழக்குப்பதிவு செய்த காவல்துறையினர், அப்பகுதியில் உள்ள சிசிடிவி கேமராக்களின் காட்சிகளை தீவிரமாக ஆய்வு செய்து வருகின்றனர்.
மில்லில் பொருத்தப்பட்டிருந்த சிசிடிவி காட்சிகளில், திருட்டில் ஈடுபட்ட இளைஞர்கள் மில்லுக்குள் புகுந்து பொருட்களை எடுத்துச் செல்லும் காட்சிகள் தெளிவாக பதிவாகியுள்ளதாக கூறப்படுகிறது. அந்த காட்சிகளின் அடிப்படையில் சந்தேக நபர்களின் முகம், உடை மற்றும் அவர்கள் வந்துச் சென்ற பாதை குறித்து காவல்துறையினர் விசாரணையை தீவிரப்படுத்தியுள்ளனர்.
மேலும், தேனி பைபாஸ் சாலை மற்றும் அதனைச் சுற்றியுள்ள தொழிற்சாலைகள் அதிகம் உள்ள பகுதிகளில் கூடுதல் காவல் கண்காணிப்பு மேற்கொள்ளப்பட்டுள்ளதாகவும், போலீசார் ரோந்து பணிகளை அதிகரித்துள்ளதாகவும் தெரிவிக்கப்பட்டுள்ளது. தொழில்நுட்ப கண்காணிப்பு மற்றும் சிசிடிவி ஆதாரங்களின் மூலம் விரைவில் குற்றவாளிகள் கைது செய்யப்படுவார்கள் என காவல்துறை தரப்பில் தெரிவிக்கப்பட்டுள்ளது.
பட்டப்பகலில், தொழிற்சாலைகள் நிறைந்த பகுதியில் நடைபெற்ற இந்தத் துணிகரமான திருட்டுச் சம்பவம், அப்பகுதி பொதுமக்கள் மற்றும் தொழிலதிபர்களிடையே பெரும் அச்சத்தையும் கவலையையும் ஏற்படுத்தியுள்ளது
