பனி இயந்திர விபத்தில் 38 எலும்புகள் உடைந்த நிலையில் உயிருக்குப் போராடி மீண்ட ஹாலிவுட் நடிகர் ஜெர்மி ரென்னர், தனது அனுபவங்களை புத்தகமாக எழுதியுள்ளார்.
‘தி ஹர்ட் லாக்கர்’, ‘தி அவஞ்சர்ஸ்’, ‘மிஷன் இம்பாசிபிள்’ உள்ளிட்ட பல ஹாலிவுட் பிளாக்பஸ்டர் படங்களில் நடித்தவர் ஜெர்மி ரென்னர். 2023-ம் ஆண்டு ஜனவரி 1-ம் தேதி, 6,500 கிலோ எடையுள்ள பனி இயந்திரத்தை இயக்கும்போது நிகழ்ந்த விபத்தில் சிக்கி, அவரது உடலில் 38 எலும்புகள் முறிந்தன. இதையடுத்து பல நாட்கள் அவர் கோமா நிலையில் சிகிச்சை பெற்றார்.
இந்நிலையில், “My Next Breath” என்ற பெயரில் வெளியாகியுள்ள தனது புதிய புத்தகத்தில், அந்த கோர அனுபவத்தையும், அதிலிருந்து மீண்ட தனது வாழ்வியலையும் ஜெர்மி விவரித்துள்ளார்.
“விபத்தில் சிக்கி உயிர் தப்ப முடியாது என யாரும் நம்பவில்லை. ஆனால் அந்த வேளையில் நான் என்னிடம் சொன்னதெல்லாம் ஒரே ஒரு விஷயம் – ‘மூச்சில் கவனம் செலுத்து’. ஆழமாக மூச்சு இழுத்தேன். அந்த நிமிடங்களில்தான், உயிரை பிடித்துக் கொண்டேன்.”
அத்துடன், “நான் மீண்டு வர முக்கிய காரணம் என் மகள் தான். அவளுக்காகவே எழுந்தேன். தினமும் எழுதி எழுதிதான் என் மனச்சோர்வை எப்படியாவது கடந்து வந்தேன். எழுத்து எனக்கு ஒரு சிகிச்சை போல ஆனது,” என தெரிவித்துள்ளார்.
“இந்த அனுபவம் என் வாழ்நிலை முழுக்க மாற்றம் கொண்டு வந்தது. இப்போது எனக்கு குடும்பமே முதல் முன்னிலை. வேலை எல்லாம் இரண்டாம் தரம்தான். ஒவ்வொரு நாளையும் மகிழ்ச்சியுடன் வாழ வேண்டியது தான் முக்கியம்” என அவர் கூறியுள்ளார்.
