சென்னை: தமிழகத்தில் வரும் நவம்பர் 17ஆம் தேதி செங்கல்பட்டு, விழுப்புரம், கள்ளக்குறிச்சி உள்ளிட்ட 8 மாவட்டங்களில் கனமழை பெய்யும் வாய்ப்பு இருப்பதாக சென்னை வானிலை மையம் அறிவித்துள்ளது.
வானிலை மையம் வெளியிட்ட சமீபத்திய அறிக்கையின் படி, இன்று ராமநாதபுரம், தூத்துக்குடி, தென்காசி, திருநெல்வேலி, கன்னியாகுமரி ஆகிய மாவட்டங்களில் மிதமானது முதல் கனமழை வரை பெய்யக்கூடும் என குறிப்பிடப்பட்டுள்ளது.
அதேபோல், வரும் நவம்பர் 17ஆம் தேதி செங்கல்பட்டு, விழுப்புரம், கள்ளக்குறிச்சி, கடலூர், மயிலாடுதுறை, தஞ்சாவூர், நாகப்பட்டினம் மற்றும் திருவாரூர் ஆகிய மாவட்டங்களில் கனமழை பெய்யும் சாத்தியம் உள்ளது.
இதனைத் தொடர்ந்து, நவம்பர் 18ஆம் தேதி மயிலாடுதுறை, திருவாரூர், நாகப்பட்டினம், தஞ்சாவூர், புதுக்கோட்டை மற்றும் ராமநாதபுரம் மாவட்டங்களில் கனமழை பெய்ய வாய்ப்பு இருப்பதாகவும் வானிலை மையம் தெரிவித்துள்ளது.
மழை எச்சரிக்கையையொட்டி, பொதுமக்கள் அவசியமான முன்னெச்சரிக்கை நடவடிக்கைகளை மேற்கொள்ளுமாறும், மீனவர்கள் கடலுக்கு செல்லாமல் இருக்குமாறும் அதிகாரிகள் அறிவுறுத்தியுள்ளனர்.