இந்தியாவில் திருமணம், பண்டிகை, பரிசு போன்ற அனைத்து சந்தர்ப்பங்களிலும் தங்கம் மங்களகரமானதாகக் கருதப்படுகிறது. பொதுமக்கள் முதலீட்டிற்கும் பெரிதும் பயன்படுத்தும் தங்கத்தின் விலை தற்போது வரலாறு காணாத உயர்வை எட்டியுள்ளது.
இன்றைய நிலவரப்படி, 22 காரட் தங்கம் ஒரு கிராம் ரூ.10,280க்கும், ஒரு சவரன் ரூ.82,240க்கும் விற்பனையாகிறது. 18 காரட் தங்கம் ஒரு கிராம் ரூ.8,515க்கும், சவரன் ரூ.68,120க்கும் விலை நிர்ணயிக்கப்பட்டுள்ளது. அதே நேரத்தில், வெள்ளி விலையும் கிராமுக்கு ரூ.144 ஆக உயர்ந்துள்ளது.
நிபுணர்கள் கூறுவதன்படி, 24 காரட் தங்கத்தின் 10 கிராம் விலை 2026ஆம் ஆண்டுக்குள் ரூ.1.5 லட்சத்தை எட்டக்கூடும் என மதிப்பிடப்படுகிறது.
உயர்வுக்குப் பின்னால் உள்ள காரணங்கள் கொரோனா தொற்றுக்குப் பிறகு ஏற்பட்ட உலகளாவிய பொருளாதார மந்தநிலை, ரஷ்யா–உக்ரைன் போர், அமெரிக்க வட்டி விகித மாற்றங்கள் உள்ளிட்ட பல காரணிகள் தங்க விலை உயர்வுக்குக் காரணமாக உள்ளன. மேலும், பல நாடுகளின் மத்திய வங்கிகள் அதிக அளவில் தங்கத்தை குவித்து வருவது, சந்தை தேவையை அதிகரித்துள்ளது. தங்க ETF முதலீடுகளும் விலை உயர்வுக்கு ஆதரவாக செயல்படுகின்றன.
முதலீட்டாளர்களுக்கு நிபுணர்கள் பரிந்துரை
தங்கம் எப்போது குறையும், எப்போது உயரும் என்பதை கணிப்பது கடினம் என்பதால், தவணை முறையில் சிறிது சிறிதாக வாங்குவது நல்லது என நிபுணர்கள் அறிவுறுத்துகின்றனர். விலை அதிகமாக இருக்கும் போது குறைவாகவும், விலை குறையும் போது அதிகமாகவும் வாங்குவது ஒரு பாதுகாப்பான முதலீட்டு உத்தி என அவர்கள் கூறுகின்றனர்.
எதிர்காலம்
உலக சந்தைகளில் நிலவும் நிச்சயமற்ற சூழ்நிலை நீடிக்கும் வரை தங்க விலைகள் அதிகம் குறைய வாய்ப்பு இல்லை என்று ஆய்வாளர்கள் தெரிவித்துள்ளனர். அதனால், நீண்டகால முதலீட்டில் தங்கம் ஒரு பாதுகாப்பான தேர்வாகவே தொடரும் என நிபுணர்கள் வலியுறுத்துகின்றனர்.
