திருநெல்வேலி மாவட்டத்தில் தாய் ஒருவரும், அவருடைய இரு சிறுமிகளும் கிணற்றில் உயிரிழந்தது பரபரப்பை ஏற்படுத்தியுள்ளது.
நெல்லை மாவட்டம் கங்கைகொண்டான் அருகே அனைத்தலையூர் கிராமத்தைச் சேர்ந்த முத்தையா, முத்துலட்சுமி தம்பதியருக்கு முத்தமிழ் (4) மற்றும் சுசிலா (3) என்ற இரண்டு பெண் குழந்தைகள் உள்ளனர். குடும்பத்திற்காக ஆட்டோ ஓட்டிவந்த முத்தையா, மது பழக்கத்துக்கு அடிமையாகி வீட்டுச் செலவிலும் சீர்குலைவு ஏற்பட்டதாகக் கூறப்படுகிறது.
கணவனின் மது பழக்கத்தால் மனவேதனையில் இருந்த முத்துலட்சுமி, அடிக்கடி தகராறுகள் ஏற்பட்டதால் குழந்தைகளுடன் தாய் வீட்டிற்கு சென்றுள்ளார். பின்னர் முத்தையா அங்கு சென்று மனைவியிடம் மீண்டும் சேர்ந்து வாழுமாறு வற்புறுத்தியதாகவும், அதற்கு மறுப்பு தெரிவித்த மனைவியை தாக்கியதாகவும் தகவல்கள் தெரிவிக்கின்றன.
இந்தச் சூழலில், மன உளைச்சலில் இருந்த முத்துலட்சுமி, நேற்று தனது இரு மகள்களையும் அழைத்துக்கொண்டு காட்டுப்பகுதியில் உள்ள ஒரு கிணற்றுக்குச் சென்றுள்ளார். அங்கு குழந்தைகளை கிணற்றுக்குள் தள்ளி, பின்னர் தானும் அதே கிணற்றில் குதித்து உயிரை மாய்த்துக்கொண்டதாக ஆரம்ப விசாரணையில் தெரியவந்துள்ளது.
நீண்ட நேரமாக மூவரும் வீடு திரும்பாததால் உறவினர்கள் தேடியபோது, கிணற்றருகே காலணிகள் கிடந்தன. உடனடியாக போலீசும் தீயணைப்பு துறையும் தகவல் பெற, இரு சிறுமிகளின் உடல்கள் முதலில், பின்னர் தாயின் உடலும் மீட்கப்பட்டன.
இந்தச் சம்பவம் அனைத்தலையூர் மற்றும் சுற்றுவட்டாரத்தில் பெரும் அதிர்ச்சியை ஏற்படுத்தியுள்ளது. கங்கைகொண்டான் போலீசார் வழக்குப்பதிவு செய்து விசாரணை நடத்தி வருகின்றனர்.
