தென்னிந்தியாவின் முட்டை உற்பத்தி மையமாகத் திகழும் நாமக்கல்லில், முட்டையின் பண்ணைக் கொள்முதல் விலை இன்று மீண்டும் 20 காசுகள் குறைக்கப்பட்டுள்ளது. கடந்த சில வாரங்களாக ஏறுமுகத்தில் இருந்து, ஒரு முட்டை ரூ.6.40 என்ற வரலாற்று உச்சத்தைத் தொட்ட நிலையில், தற்போது நுகர்வு குறைவு காரணமாக விலை சரியத் தொடங்கியுள்ளது. இதன்படி, கடந்த நான்கு நாட்களில் மட்டும் முட்டை விலை ஒட்டுமொத்தமாக 80 காசுகள் சரிந்து, தற்போது ஒரு முட்டையின் விலை ரூ.5.60 ஆக நிர்ணயம் செய்யப்பட்டுள்ளது. தேசிய முட்டை ஒருங்கிணைப்புக் குழுவின் (NECC) நாமக்கல் மண்டல ஆலோசனைக் கூட்டத்தில் இந்த விலை குறைப்பு முடிவு எடுக்கப்பட்டது.
முட்டை விலை சரிவிற்கான முக்கியக் காரணங்களாகப் பல்வேறு வணிக ரீதியான மாற்றங்கள் சுட்டிக்காட்டப்படுகின்றன. பொதுவாகக் குளிர்காலத்தில் வட மாநிலங்களில் முட்டைக்கான தேவை அதிகரித்து விலையும் உயரும். ஆனால், தற்போது வட மாநிலங்களில் நிலவும் பருவநிலை மாற்றங்கள் மற்றும் முட்டை நுகர்வு எதிர்பார்த்த அளவை விடக் குறைந்திருப்பதால், அங்கிருந்து வரும் தேவையின் அளவு சரிந்துள்ளது. இதன் எதிரொலியாக ஹைதராபாத், விஜயவாடா, பர்வாலா போன்ற பிற மண்டலங்களிலும் முட்டை விலை குறைந்து வருகிறது. பிற மண்டலங்களில் விலை குறையும்போது, நாமக்கல் மண்டல முட்டைகள் தேக்கமடையாமல் இருக்க விலையைக் குறைக்க வேண்டிய சூழல் பண்ணையாளர்களுக்கு ஏற்பட்டுள்ளது.
மேலும், கிறிஸ்துமஸ் மற்றும் புத்தாண்டு விடுமுறைகளுக்குப் பிறகு பள்ளிகளுக்கு வழங்கப்பட்டு வந்த முட்டைகளின் தேவையிலும் சிறு மாற்றங்கள் ஏற்பட்டுள்ளன. சில்லறை விற்பனை சந்தையில் முட்டை விலை உயர்வால் நுகர்வோர் வாங்கும் அளவு குறைந்ததும் ஒரு காரணமாகக் கருதப்படுகிறது. வரும் நாட்களில் தைப்பொங்கல் பண்டிகை மற்றும் சபரிமலை சீசன் போன்ற காரணங்களால் முட்டை விற்பனை மேலும் மந்தமாக வாய்ப்புள்ளதாகக் கூறப்படுகிறது. இருப்பினும், நுகர்வு மீண்டும் அதிகரிக்கும் பட்சத்தில் விலை உயரக்கூடும் என எதிர்பார்க்கப்படுகிறது. இந்தத் தொடர் விலை சரிவு நுகர்வோருக்குச் சற்று நிம்மதியைத் தந்தாலும், தீவன விலை உயர்வால் பாதிக்கப்பட்டுள்ள கோழிப் பண்ணையாளர்களுக்கு இது பெரும் கவலையை ஏற்படுத்தியுள்ளது.
