நீலகிரி மாவட்டம் கோத்தகிரி மற்றும் அதன் சுற்றுவட்டாரப் பகுதிகளான கூக்கல்தொரை, நெடுகுளா, ஈளாடா, கட்டபெட்டு உள்ளிட்ட கிராமங்களில் நடப்பு போகத்தில் அதிக பரப்பளவில் கேரட் பயிரிடப்பட்டுள்ளது. தற்போது இப்பகுதிகளில் நிலவும் கடும் பனிப்பொழிவு மற்ற பயிர்களைப் பாதித்தாலும், கேரட் பயிருக்குக் கூடுதல் பாதிப்பை ஏற்படுத்தவில்லை என்பது விவசாயிகளுக்குச் சற்று நிம்மதியை அளித்துள்ளது. இருப்பினும், பகல் நேரங்களில் நிலவும் சுட்டெரிக்கும் வெயிலால் பயிர்கள் வாடிவிடாமல் இருக்க, விவசாயிகள் மோட்டார்கள் மூலம் நீர் பாய்ச்சி மிகவும் கவனமாகப் பராமரித்து வருகின்றனர். தற்போது பல இடங்களில் கேரட் பயிர்கள் அறுவடைக்குத் தயாராகி வருவதைத் தொடர்ந்து, விவசாயிகள் அறுவடைப் பணிகளில் மும்முரமாக ஈடுபட்டுள்ளனர்.
இருப்பினும், விளைச்சல் சிறப்பாக இருந்தும் சந்தையில் நிலவும் விலை நிலவரம் விவசாயிகளுக்குப் பெரும் கவலையை ஏற்படுத்தியுள்ளது. கோத்தகிரி, ஊட்டி மற்றும் குன்னூர் ஆகிய உள்ளூர் மார்க்கெட்டுகளில் ஒரு கிலோ கேரட் 25 ரூபாய் முதல் 35 ரூபாய் வரை மட்டுமே கொள்முதல் செய்யப்படுகிறது. வியாபாரிகள் மிகக் குறைந்த விலையைக் கேட்பதால், சாகுபடி செய்த செலவு கூடக் கிடைக்காமல் விவசாயிகளுக்குக் கணிசமான நஷ்டம் ஏற்படும் சூழல் உருவாகியுள்ளது. உரங்கள், கூலி மற்றும் பராமரிப்புச் செலவுகளைக் கணக்கிடும்போது இந்த விலை போதுமானதாக இல்லை என விவசாயிகள் வேதனை தெரிவிக்கின்றனர்.
உள்ளூர் சந்தையில் ஏற்படும் பொருளாதார இழப்பைத் தவிர்க்கும் நோக்கில், கோத்தகிரி பகுதி விவசாயிகள் தற்போது மாற்று நடவடிக்கையில் இறங்கியுள்ளனர். இடைத்தரகர்களைத் தவிர்த்து அதிக லாபம் பெறுவதற்காக, லாரிகளை வாடகைக்கு அமர்த்தி தங்களது விளைபொருட்களை நேரடியாக மேட்டுப்பாளையம் மண்டிகளுக்குக் கொண்டு செல்கின்றனர். அங்கு நிலவும் வெளிச்சந்தை விலையின் அடிப்படையில் கேரட்டை விற்பனை செய்வதன் மூலம் தங்களுக்குக் கூடுதல் லாபம் கிடைப்பதாக அவர்கள் தெரிவிக்கின்றனர். கடும் குளிரையும் பொருட்படுத்தாமல் உழைத்த உழைப்பிற்கு ஏற்ற நியாயமான விலை கிடைக்க வேண்டும் என்பதே இப்பகுதி விவசாயிகளின் எதிர்பார்ப்பாக உள்ளது.
