சேலம்: சேலம் மாவட்டம் மேச்சேரி சக்தி நகர் பகுதியை சேர்ந்த தனபாலின் மகன் ரவி, லாரி டிரைவராக வேலை பார்த்து வந்தார்.
கடந்த ஆகஸ்ட் 2-ஆம் தேதி, லாரி உரிமையாளர் சக்தியுடன் வேலைக்காக ஹைதராபாத் சென்ற ரவி, ஆகஸ்ட் 8-ஆம் தேதி உடல்நலக் குறைவால் இறந்துவிட்டார் என அவரது குடும்பத்தினருக்கு தகவல் தெரிவிக்கப்பட்டது. பின்னர், அவரது உடல் சொந்த ஊருக்கு கொண்டு வரப்பட்டு தகனம் செய்யப்பட்டது.
ஆனால், முகத்தில் காயங்கள் இருந்ததாகக் கூறிய ரவியின் தாய் சரோஜா, “மகனை அடித்து கொன்றுவிட்டு, அதை மறைக்க அவசரமாக தகனம் செய்துவிட்டனர்” என்று சந்தேகம் வெளியிட்டார்.
இதனை தொடர்ந்து, அவர் கடந்த 12-ஆம் தேதி மேச்சேரி போலீசில் புகார் அளித்தும் எந்த நடவடிக்கையும் எடுக்கப்படவில்லை. இதனால், நேற்று தனது கணவருடன் சேலம் கலெக்டர் அலுவலகத்தில் மனு அளித்தார்.
“சந்தேக மரணம் குறித்து போலீசார் விசாரணை நடத்த வேண்டும். மகன் மரணத்திற்கான உண்மையான காரணம் கண்டறியப்பட வேண்டும்” என சரோஜா வலியுறுத்தினார்.
