சென்னை: திமுகவிடம் வெளிப்படைத்தன்மை இல்லை என்றும், பிரச்சனைகளை மறைப்பதே அந்தக் கட்சியின் நோக்கமாக இருக்கிறது என்றும் த.வெ.க. பொதுச்செயலாளர் ஆதவ் அர்ஜூனா விமர்சித்துள்ளார்.
நிருபர்களை சந்தித்த அவர் பேசுகையில், “வக்ப் சட்டத்திற்கு எதிராக திமுக ஏன் வாதாடவில்லை? ஏன் இணைந்து கொள்ளவில்லை? இதை நாம் கேட்க வேண்டியது தான். திமுகவைக் குறைக்கும் நோக்கமல்ல இது. ஆனால், இந்த விவகாரத்தில் அனைத்து கட்சிக் கூட்டத்தை தமிழக அரசு நடத்த வேண்டும்,” எனக் கூறினார்.
பொள்ளாச்சி வழக்கில் விளம்பர அரசியல்:
பொள்ளாச்சி பாலியல் வழக்கில் சமீபத்தில் தீர்ப்பு வெளியாகிய பின்னர், திமுக அரசு ‘ஸ்டிக்கர் அரசாக’ செயல்படுகிறது என அவர் குற்றம்சாட்டினார். “அந்த வழக்கில் அனைத்துக் கட்சிகளும் சேர்ந்து போராடினதால்தான் அது சி.பி.ஐ.க்கு மாற்றப்பட்டது. இதற்காக தமிழக அரசு பாராட்டப்படவேண்டும். ஆனால் அதே நேரத்தில், அந்த வழக்கில் தமிழக போலீசாரின் பங்கு என்ன? அரசு அதில் எப்படி பங்கேற்றது? இவை கேள்விக்குறிகளாக உள்ளன,” என்றார்.
பழைய பிரச்சனைகளை தூக்கி திசைதிருப்பம்:
“தி.மு.க.,விடம் வெளிப்படைத்தன்மை கிடையாது. பிரச்சனை எழும்பும் போதெல்லாம் இருமொழிக் கொள்கை, தொகுதி மறுவரையறை போன்ற விஷயங்களை முன்வைத்து திசை திருப்புகிறார்கள். ஊழல் குற்றச்சாட்டுகள் வந்தால் பா.ஜ.,வை எதிர்த்து கவனத்தை மாற்றுகிறார்கள்,” என்றும் அவர் கூறினார்.
விஜய் குறித்து கருத்து:
“அரசியல் எதிரி திமுக; கொள்கை எதிரி பாஜக என விஜய் கூறியதை நான் வரவேற்கிறேன். அதே மனநிலையில் நானும் இருக்கிறேன். ஆனால், எதிர்க்கட்சியை ஏன் எதிர்க்க வேண்டும் என எனக்கு புரியவில்லை,” என்றார் ஆதவ் அர்ஜூனா.
த.வெ.க. இயக்கத்துக்கான திட்டங்கள்:
“அதிமுக பல தேர்தல்களில் தோல்வியடைந்துள்ளது. எதிர்க்கட்சியாக இருக்க, திட்டமிடல் அவசியம். 2026 தேர்தலுக்குப் பிறகு திமுகவின் இறுமாப்பு எங்கு இருக்கிறது என்பதை மக்கள் தான் தீர்மானிப்பார்கள். த.வெ.க. இயக்கத்தின் பிரசாரம் மற்றும் மக்கள் சந்திப்பு டிசம்பருக்குள் பெரும் தாக்கத்தை உருவாக்கும்,” என்றார்.
