தமிழக வனத்துறையின் சார்பில் மாநிலம் முழுவதும் ஒருங்கிணைந்த நீர்வாழ் பறவைகள் கணக்கெடுப்புப் பணி தீவிரமாக நடைபெற்று வருகிறது. பொதுவாக, வெளிநாட்டுப் பறவைகள் அக்டோபர் மாத இறுதியில் தமிழகத்திற்கு வலசை வரத் தொடங்கி, ஏப்ரல் மாதம் வரை தங்கியிருக்கும். இந்த இடைப்பட்ட காலத்தில், நீர்நிலைகளின் ஆரோக்கியத்தையும், பறவைகளின் எண்ணிக்கையையும் துல்லியமாகக் கண்டறிய டிசம்பர் மாதத்தில் கணக்கெடுப்பு நடத்தப்படுவது வழக்கம். அந்த வகையில், ராமநாதபுரம் வன உயிரினக் காப்பாளர் அகில்தம்பி தலைமையில், கடந்த டிசம்பர் 27 மற்றும் 28 ஆகிய தேதிகளில் மாவட்டத்தின் 29 முக்கிய இடங்களில் இந்தப் பிரம்மாண்ட கணக்கெடுப்புப் பணி வெற்றிகரமாக நடைபெற்றது.
இந்தக் கணக்கெடுப்பிற்காகப் பறவைகள் அதிகம் கூடும் இடங்களான தேர்த்தங்கல், சக்கரகோட்டை, காஞ்சிராங்குளம், சித்திரங்குடி, மேல-கீழசெல்வனூர் போன்ற உள்நாட்டுச் சரணாலயங்களும், மன்னார் வளைகுடா கடல்சார் தேசியப் பூங்காவிற்கு உட்பட்ட தலையாரிதீவு, வாலைதீவு, குருசடைதீவு, சிங்கில்தீவு, மணலிதீவு போன்ற தீவுப் பகுதிகளும் தேர்வு செய்யப்பட்டன. மேலும், வாலிநோக்கம், நதிபாலம், புதுமடம், தனுஷ்கோடி, அரிச்சல்முனை, சோலியக்குடி, காரங்காடு மற்றும் திருப்பாலைக்குடி உள்ளிட்ட 29 இடங்களிலும் ஒரே நேரத்தில் ஆய்வுப் பணிகள் தொடங்கின. இந்தப் பணியில் வனத்துறை அலுவலர்களுடன் இணைந்து இயற்கை ஆர்வலர்கள், கல்லூரி மாணவர்கள் மற்றும் புகழ்பெற்ற வனவிலங்கு புகைப்படக் கலைஞர்கள் எனப் பல தரப்பினர் ஆர்வத்துடன் பங்கேற்றனர்.
இது குறித்து வனத்துறையினர் கூறுகையில், “பறவைகளின் தற்போதைய எண்ணிக்கை மற்றும் அவற்றின் இனப்பெருக்கச் சூழலைக் கண்காணிப்பதே இந்தக் கணக்கெடுப்பின் முக்கிய நோக்கமாகும். முதற்கட்டமாகத் தேர்த்தங்கல் போன்ற உள்நாட்டு ஈரநிலப் பறவைகளும், இரண்டாம் கட்டமாகக் கடல்சார் ஈரநிலங்களில் வசிக்கும் பறவைகளும் கணக்கிடப்பட்டன. கடந்த ஆண்டுகளை விட இந்த ஆண்டு போதிய மழைப்பொழிவு மற்றும் நீர்நிலைகளில் உணவு ஆதாரங்கள் சிறப்பாக இருப்பதால், வெளிநாட்டுப் பறவைகளின் வருகை வழக்கத்தை விட அதிகளவில் உள்ளது. குறிப்பாக ஐரோப்பா மற்றும் சைபீரியா நாடுகளில் இருந்து வரும் அரிய வகை பறவைகளை இம்முறை காண முடிந்தது. சேகரிக்கப்பட்ட தரவுகள் அனைத்தும் ஒருங்கிணைக்கப்பட்டு, அதிகாரப்பூர்வப் புள்ளிவிவரங்கள் விரைவில் வெளியிடப்படும்,” என்று தெரிவித்தனர்.
