வங்கதேசத்தின் இடைக்கால நிர்வாகம், முன்னாள் பிரதமர் ஷேக் ஹசீனாவை இந்தியாவில் இருந்து மீண்டும் வங்கதேசத்திற்குத் திருப்பி அனுப்பும் முயற்சியில் தீவிரமாக செயல்பட்டு வருகிறது. இந்த நடவடிக்கைக்காக இன்டர்போலின் சிவப்பு அறிவிப்பை (Red Notice) கோருவதற்கான பணிகள் தொடங்கப்பட்டுள்ளதாக அந்நாட்டு அதிகாரிகள் தெரிவித்துள்ளனர்.
பிரதமர் ஹசீனாவுக்கு மரண தண்டனை
கடந்த ஆண்டு வங்கதேசத்தில் நடந்த எதிர்ப்புப் போராட்டங்களில் ஆயிரத்திற்கும் மேற்பட்டோர் உயிரிழந்ததாகவும், பல ஆயிரம் பேர் காயமடைந்ததாகவும் குற்றச்சாட்டுகள் எழுந்தன. இந்த வழக்கை விசாரித்த சர்வதேச குற்றவியல் தீர்ப்பாயம், வன்முறைக்கு ஹசீனா பொறுப்பானவர் எனத் தீர்மானித்து அவருக்கு மரண தண்டனை விதித்தது. இந்த தீர்ப்பு வெளியாகியதைத் தொடர்ந்து வங்கதேசம் முழுவதும் பதற்றமான சூழல் உருவாகியுள்ளது.
இந்தியாவுக்கு அதிகாரப்பூர்வ கடிதம்
தண்டனை விளக்கத்திற்குப் பின் வங்கதேச இடைக்கால அரசு, இந்தியாவுக்கு கடிதம் எழுதி ஹசீனாவை ஒப்படைக்க வேண்டுகோள் வைத்துள்ளதாக தகவல்கள் தெரிவிக்கின்றன. இரு நாடுகளுக்கிடையே முன்னே இருக்கும் குற்றவாளிகளை பரிமாறிக்கொள்வதற்கான ஒப்பந்தத்தின் அடிப்படையில், இந்தியா ஒத்துழைக்க வேண்டும் என்ற வலியுறுத்தலும் அந்தக் கடிதத்தில் இடம்பெற்றிருக்கிறது.
இந்திய அரசு, வங்கதேச மக்களின் நலன், அமைதி, நிலைத்தன்மை ஆகியவற்றுக்கு தாங்கள் தொடர்ந்து ஆதரவாக இருப்போம் என பொது ரீதியிலான பதிலை வெளியிட்டுள்ளது. ஆனால், 2013ல் கையெழுத்தான ஒப்படைப்பு ஒப்பந்தத்தின் படி, அரசியல் நோக்கத்துடன் செய்யப்பட்ட கோரிக்கைகள் நிராகரிக்கப்படலாம் என்பதும் குறிப்பிடப்படுகிறது.
வங்கதேசத்தின் சட்ட ஆலோசகர்கள், தீர்ப்பாயம் வழங்கிய தண்டனையின் அடிப்படையில் இன்டர்போல் புதிய சிவப்பு அறிவிப்பை வெளியிட வேண்டும் என்று கோரிக்கை அனுப்பத் திட்டமிட்டுள்ளனர். முன்பு அனுப்பப்பட்ட கைது வாரண்டின் அடிப்படையிலான கோரிக்கை தற்போது புதுப்பிக்கப்படுகின்றது.
அவாமி லீக் கட்சியின் எதிர்ப்புகள்
இந்நிலையிலோ, ஷேக் ஹசீனாவின் ஆதரவாளர்கள் இந்த தீர்ப்பை ‘ஒருதலைப்பட்சமானது’ மற்றும் ‘சட்ட ரீதியாகத் தவறானது’ என்று குற்றம்சாட்டி வருகின்றனர்.
அத்தோடு, ஹசீனாவை பாதுகாப்பது இந்தியாவின் பொறுப்பாக இருக்க வேண்டும் என்றும், இடைக்கால அரசு நாட்டை தீவிரவாத சூழ்நிலைக்குத் தள்ளக்கூடும் என்றும் அவாமி லீக் தலைவர்கள் எச்சரித்துள்ளனர்.
