துபாய்: ஆசியக் கோப்பை கிரிக்கெட் தொடரில் பாகிஸ்தான் அணி, ஐக்கிய அரபு அமீரகத்தை வீழ்த்தி சூப்பர் 4 சுற்றுக்கு தகுதி பெற்றது.
இந்தியா-பாகிஸ்தான் போட்டி சர்ச்சை :
முன்னதாக, இந்தியா-பாகிஸ்தான் மோதலில் ஆட்ட முடிவுக்குப் பிறகு இரு அணிகளும் கைகுலுக்காமல் மைதானத்தை விட்டு வெளியேறிய சம்பவம் பெரிய விவாதமாகியது. டாஸ் நேரத்திலும் கேப்டன்கள் கை குலுக்காதது சர்ச்சையை தீவிரப்படுத்தியது. இதனைத் தொடர்ந்து பாகிஸ்தான் கிரிக்கெட் வாரியம் கடும் எதிர்ப்பு தெரிவித்ததோடு, நடுவர் ஆண்டி பைக்கிராஃப்ட்டை நீக்க வேண்டும் என்று சர்வதேச கிரிக்கெட் கவுன்சிலில் புகார் அளித்தது. ஆனால் ஐசிசி அந்தக் கோரிக்கையை நிராகரித்த நிலையில், பாகிஸ்தான் அணியின் போட்டிகளுக்கு ரிச்சி ரிச்சர்ட்சன் நடுவராக நியமிக்கப்பட்டார்.
பாகிஸ்தானின் வெற்றி
நேற்றைய கடைசி லீக் ஆட்டத்தில் ஐக்கிய அரபு அமீரகத்தை எதிர்கொண்ட பாகிஸ்தான், முதலில் பேட்டிங் செய்து 20 ஓவர்களில் 9 விக்கெட்களுக்கு 146 ரன்கள் சேர்த்தது. ஃபகார் ஜமான் 50 ரன்கள், கேப்டன் சல்மான் 20 ரன்கள், ஷகீன் அப்ரிடி 29* ரன்கள் என முக்கிய பங்களிப்பு செய்தனர்.
அமீரக அணியில் ஜுனைத் சித்திக் 4 விக்கெட்களும், சிங் ஹாங் 3 விக்கெட்களும் வீழ்த்தினர்.
பின்னர் 147 ரன்கள் இலக்குடன் களமிறங்கிய அமீரகம், 17.4 ஓவர்களில் 105 ரன்களுக்குச் சுருண்டது. விக்கெட் கீப்பர் ராகுல் சோப்ரா மட்டும் 35 ரன்கள் எடுத்தார். இதனால் 41 ரன்கள் வித்தியாசத்தில் வென்ற பாகிஸ்தான் அணி, இந்தியாவுக்கு அடுத்ததாக சூப்பர் 4 சுற்றுக்கு முன்னேறியது. யுஏஇ மற்றும் ஓமன் அணிகள் அடுத்த சுற்று வாய்ப்பை இழந்தன.
நடுவரின் தலையில் பந்து தாக்கிய அதிர்ச்சி :
போட்டி நடந்து கொண்டிருக்கும்போது எதிர்பாராத சம்பவம் ஒன்று நடந்தது. யுஏஇ அணி பேட்டிங் செய்யும் வேளையில், பாகிஸ்தான் வீரர் வீசிய த்ரோ பந்து கள நடுவரான ருசிரா பள்ளியகுருகேவின் தலையில் பக்கவாட்டில் மோதி அவரை காயப்படுத்தியது. உடனடியாக மருத்துவர்கள் சிகிச்சை அளித்தனர். தொடர்ந்து நடுவராகச் செயல்பட முடியாத நிலையில் அவர் மைதானத்தை விட்டு வெளியேறினார். மாற்று நடுவராக காசி சோஹேல் பொறுப்பேற்றார்.
தாமதமான தொடக்கம் :
பாகிஸ்தான் அணியின் நடுவர் குறித்த எதிர்ப்பினால் ஏற்பட்ட சர்ச்சை காரணமாக, இந்தப் போட்டி ஒரு மணி நேரம் தாமதமாகத் தொடங்கியது. இருப்பினும் ஆட்டத்தில் வெற்றி பெற்று, அடுத்த கட்டத்துக்கு பாகிஸ்தான் முன்னேறியது.
