ஆந்திர மாநிலத்தில் ரூ.3,500 கோடி மதிப்பிலான மதுபான ஊழல் வழக்கில் முன்னாள் முதல்வர் மற்றும் ஒய்எஸ்ஆர் காங்கிரஸ் தலைவர் ஜெகன்மோகன் ரெட்டி மீது சிக்கல்கள் எழுந்துள்ளன. இவ்வழக்கில், மாநில அரசு அமைத்த சிறப்பு விசாரணை குழு தனது முதல் குற்றப்பத்திரிகையை நீதிமன்றத்தில் தாக்கல் செய்துள்ளது.
2019 முதல் 2024 வரையிலான ஒய்எஸ்ஆர் காங்கிரஸ் ஆட்சிக் காலத்தில், மதுபான விநியோகத்தில் பெரியளவிலான முறைகேடுகள் நடந்ததாக குற்றச்சாட்டுகள் எழுந்தன. இந்த வழக்கில், ஒய்எஸ்ஆர் காங்கிரஸ் எம்.பி. மிதுன் ரெட்டியுடன் சேர்த்து 12 பேர் வரை கைது செய்யப்பட்டுள்ளதாக தகவல்கள் தெரிவிக்கின்றன.
சுமார் 300 பக்கங்களில் உள்ள குற்றப்பத்திரிகையில், 30க்கும் மேற்பட்ட போலி நிறுவனங்கள் மூலம் நிதி மோசடி செய்யப்பட்டு, அந்த தொகை துபாய் மற்றும் ஆப்பிரிக்கா நாடுகளில் நிலம், தங்கம் மற்றும் ஆடம்பர சொத்துகளில் முதலீடு செய்யப்பட்டதாக கூறப்பட்டுள்ளது.
ஜெகன்மோகன் ரெட்டி குற்றப்பத்திரிகையில் நேரடியாக குற்றவாளியாக குறிப்பிடப்படவில்லை என்றாலும், லஞ்சம் பெற்றதாக குற்றச்சாட்டு உள்ளடக்கப்பட்டுள்ளது.
இது குறித்து X தளத்தில் தனது பதிலை வெளியிட்ட ஜெகன், “இது முழுவதுமாக அரசியல் அடிப்படையிலான பழிவாங்கும் நடவடிக்கை. முக்கிய பிரச்சனைகளிலிருந்து மக்கள் கவனத்தை திருப்ப வைக்க புனையப்பட்ட கதை. விசாரணை குழுவின் அறிக்கைகள் அழுத்தம், அச்சுறுத்தல் மற்றும் தூண்டுதல்களில் உருவானவை” எனக் குறிப்பிட்டுள்ளார்.
மேலும், “TDP தலைமையிலான தற்போதைய ஆட்சி, YSRCP அரசு ஒழித்த அதே முறைகேடான மதுபான கொள்கைகளை மீண்டும் கொண்டு வந்துள்ளது. பெல்ட் கடைகள், அனுமதி அறைகள் ஆகியவை மீண்டும் செயல்படுகின்றன” என்றும் குற்றம் சுமத்தியுள்ளார்.
இதையடுத்து, விசாரணை பாதியில் இருக்க, வழக்கு எந்த தரப்புக்கு நன்மை தரும் என்பதை நாடாளுமன்ற கூட்டத் தொடரிலும், நீதிமன்ற நடவடிக்கைகளிலும் கவனிக்க வேண்டிய கட்டாயம் ஏற்பட்டுள்ளது.
