மதுரை மாவட்டம் அலங்காநல்லூர் ஒன்றியத்திற்கு உட்பட்ட தனிச்சியம் கிராமத்தில், கரும்புத் தோட்டங்களை நாசப்படுத்தும் காட்டுப்பன்றிகளை இயற்கை முறையில் விரட்டுவது குறித்த விழிப்புணர்வு மற்றும் செயல்விளக்க நிகழ்ச்சி விவசாயிகளிடையே பெரும் வரவேற்பைப் பெற்றுள்ளது. உசிலம்பட்டி கிருஷ்ணா வேளாண்மை மற்றும் தொழில்நுட்பக் கல்லூரியின் இளநிலை இறுதியாண்டு பயிலும் மாணவர்கள், தங்களது பாடத்திட்டத்தின் ஒரு பகுதியான ‘கிராமத் தங்கல்’ திட்டத்தின் கீழ் அலங்காநல்லூர் ஒன்றியத்தில் முகாமிட்டுள்ளனர். இப்பயிற்சியின் போது, தனிச்சியம் கிராமத்தைச் சேர்ந்த விவசாயி ஜனார்த்தனன் என்பவரது கரும்புத் தோட்டத்தில் காட்டுப்பன்றிகளின் ஊடுருவலால் பயிர்கள் கடுமையாகச் சேதமடைந்து, அவர் பெரும் நஷ்டத்தைச் சந்தித்து வருவதை மாணவர்கள் கண்டறிந்தனர்.
பொதுவாகக் காட்டுப்பன்றிகள் இரவு நேரங்களில் கூட்டமாக விளைநிலங்களுக்குள் புகுந்து, கரும்புகளை வேரோடு சாய்த்து பெரும் பாதிப்பை ஏற்படுத்துகின்றன. இதனைத் தடுக்க விவசாயிகள் வழக்கமாக முள்வேலிகள் அமைப்பது, சட்டவிரோதமான மின்சார வேலிகளைப் பயன்படுத்துவது, வயலைச் சுற்றி வண்ணத் துணிகளைக் கட்டுவது மற்றும் பல்வேறு வீரியம் மிக்க இரசாயன மருந்துகளைத் தெளிப்பது போன்ற முறைகளைக் கையாண்டு வருகின்றனர். இருப்பினும், இத்தகைய முயற்சிகள் பல நேரங்களில் தோல்வியடைவதுடன், சில சமயம் மனிதர்களுக்கும் மற்ற கால்நடைகளுக்கும் ஆபத்தாக முடிகின்றன. இந்தப் பிரச்சினைக்குத் தீர்வாக, சுற்றுச்சூழல் பாதிப்பில்லாத மற்றும் செலவு குறைந்த ‘இயற்கை விரட்டி’ முறையை மாணவர்கள் அறிமுகப்படுத்தினர்.
இந்த இயற்கை விரட்டியின் மணமும் குணமும் காட்டுப்பன்றிகளை விளைநிலங்களுக்கு அருகே வரவிடாமல் தடுக்கும் ஆற்றல் கொண்டது. ஒருமுறை இதனைப் பயன்படுத்தினால் குறைந்தது மூன்று மாதங்கள் வரை அதன் செயல் திறன் நீடிக்கும் என்பது இதன் கூடுதல் சிறப்பாகும். மாணவர்கள் கார்த்திகேயன், ஜெய் பிரகாஷ், சக்திவேல், யுவராஜா, சருண் குமார், விஷ்ணு மற்றும் தரணிதரன் ஆகியோர் அடங்கிய குழுவினர், இந்த விரட்டியைத் தயாரிக்கும் முறை மற்றும் அதனை வயல்களில் பயன்படுத்தும் விதம் குறித்து விவசாயிகளுக்கு நேரடி செயல்விளக்கம் அளித்தனர்.
இந்நிகழ்வின் போது வேளாண் உதவி அலுவலர்கள் உடனிருந்து மாணவர்களின் இந்த முயற்சியைப் பாராட்டியதுடன், இத்தகைய நவீன மற்றும் இயற்கை சார்ந்த நுட்பங்களை விவசாயிகள் பயன்படுத்த முன்வர வேண்டும் என்று கேட்டுக்கொண்டனர். வனப்பகுதியை ஒட்டியுள்ள விவசாய நிலங்களில் காட்டுப்பன்றிகளின் அட்டகாசத்தைக் குறைக்க மாணவர்களின் இந்த எளிய நுட்பம் ஒரு வரப்பிரசாதமாக அமையும் என்று அப்பகுதி விவசாயிகள் மகிழ்ச்சி தெரிவித்தனர்.