மதுரை உலகத் தமிழ்ச் சங்கமும், மேலூர் அரசு கலைக்கல்லூரியின் வரலாற்றுத் துறையும் கைகோர்த்து நடத்திய 191-ஆவது தமிழ்க்கூடல் மற்றும் 55-ஆவது நூல் அரங்கேற்ற விழா, கடந்த 31.12.2025 அன்று சங்க வளாகத்தில் மிகச் சிறப்பாக நடைபெற்றது. ஆய்வு அறிஞர் முனைவர் சு. சோமசுந்தரி அவர்களின் சீரிய ஒருங்கிணைப்பில் நடைபெற்ற இந்நிகழ்ச்சி, தமிழ் இலக்கிய ஆய்வு மற்றும் வாசிப்புத் தளத்தில் ஒரு முக்கியமான நிகழ்வாக அமைந்தது. விழாவிற்குத் தலைமை தாங்கிய உலகத் தமிழ்ச் சங்க இயக்குநர் முனைவர் இ.சா. பர்வீன் சுல்தானா அவர்கள், தனது தலைமை உரையில் இலக்கிய ஆய்வுகளின் சமகாலத் தேவை குறித்து ஆழமாகப் பேசினார். ஆய்வுகள் வெறும் காகிதங்களோடு நின்றுவிடாமல், அவை சமூகத்திற்குப் பயன்படும் ஆவணங்களாக உருமாற வேண்டும் என்றும், மாணவர்கள் வாசிப்பை ஒரு தவமாக மேற்கொண்டு அதன் மூலம் விழிப்பு நிலையை அடைய வேண்டும் என்றும் அவர் அறிவுறுத்தினார்.
நிகழ்ச்சியின் ஒரு பகுதியாக, ‘புதுமைப்பித்தன் சிறுகதைகள்’ என்ற பொருண்மையில் சிவகாசி அய்ய நாடார் ஜானகி அம்மாள் கல்லூரியின் உதவிப் பேராசிரியர் முனைவர் சு. வினோத் சிறப்புரையாற்றினார். நவீன தமிழ் சிறுகதையின் தந்தை எனப் போற்றப்படும் புதுமைப்பித்தனின் கதைகளில் பொதிந்துள்ள பகடி, எள்ளல் மற்றும் அவர் சொற்களுக்கு இடையே கையாளும் அர்த்தமுள்ள மௌனம் ஆகியவை குறித்து விரிவாக விளக்கினார். குறிப்பாக, ‘சிற்பியின் நரகம்’, ‘பொன்னகரம்’, ‘கடவுளும் கந்தசாமிப் பிள்ளையும்’ போன்ற கதைகளை மேற்கோள் காட்டி, காலங்காலமாக நிலவி வரும் தொன்மங்களையும், சமூகக் கற்பிதங்களையும் தனது எழுதுகோலால் உடைத்தெறிந்த புதுமைப்பித்தனின் தனித்துவமான ஆளுமையை அவர் சுட்டிக்காட்டியது மாணவர்களிடையே பெரும் வரவேற்பைப் பெற்றது.
தொடர்ந்து நடைபெற்ற நூல் அரங்கேற்ற விழாவில், தமிழ் இலக்கிய உலகிற்குப் புதிய வரவுகளாக நான்கு நூல்கள் அறிமுகம் செய்யப்பட்டன. முனைவர் க. சுபாஷிணியின் ‘வரலாற்று ஆய்வில் களப்பணிகள்’, முனைவர் சே. முனியசாமியின் ‘வாசிப்புத் திருவிழா’, இரமணிஷர்மாவின் ‘காண்பன யாவுமாய்’ மற்றும் கவிஞர் க்ரிஷ்பாலாவின் ‘மெல்ல செத்து மீண்டு வா’ ஆகிய நூல்களை அறிஞர்கள் வெளியிட்டனர். இந்நூல்கள் குறித்து முனைவர் சு. தங்கமாரி மற்றும் சுகுமாரி சௌண்டையன் ஆகியோர் நுணுக்கமான மதிப்புரைகளை வழங்கினர். அதனைத் தொடர்ந்து நூலாசிரியர்கள் தங்களது படைப்பு அனுபவங்கள் குறித்து ஏற்புரை வழங்கினர்.
இந்நிகழ்ச்சியில் மேலூர் அரசு கலைக்கல்லூரி மாணவர்கள், பேராசிரியர்கள், ஆய்வாளர்கள் மற்றும் நூற்றுக்கும் மேற்பட்ட தமிழ் ஆர்வலர்கள் கலந்து கொண்டு சிறப்பித்தனர். இலக்கியம் ஒரு மனிதனுக்கு வாழ்க்கையைத் துணிச்சலுடன் எதிர்கொள்ளும் வலிமையைத் தரும் என்பதைத் பறைசாற்றும் விதமாக இந்த 191-ஆவது தமிழ்க்கூடல் விழா நிறைவடைந்தது.