மத்திய அரசு தேசிய ஊரக வேலை உறுதித் திட்டத்தில் (100 நாள் வேலைத் திட்டம்) மகாத்மா காந்தியின் பெயரை நீக்கியுள்ளதைக் கண்டித்தும், இத்திட்டத்தைச் சிதைக்கும் வகையில் நிதி ஒதுக்கீட்டில் மாற்றம் செய்துள்ளதைக் கண்டித்தும், கரூர் மாவட்டம் குளித்தலை மற்றும் கிருஷ்ணராயபுரம் ஊராட்சி ஒன்றிய அலுவலகங்கள் முன்பு திமுக மற்றும் அதன் கூட்டணிக் கட்சிகள் சார்பில் பிரம்மாண்ட கண்டன ஆர்ப்பாட்டங்கள் நடைபெற்றன. நாட்டின் தேசப்பிதாவின் பெயரைத் திட்டத்திலிருந்து அகற்றுவது என்பது தேசத் தலைவர்களை அவமதிக்கும் செயல் என்றும், ஏழை எளிய மக்களின் வாழ்வாதாரத்தைப் பறிக்கும் முயற்சி என்றும் ஆர்ப்பாட்டக்காரர்கள் மத்திய அரசுக்கு எதிராக முழக்கமிட்டனர்.
குளித்தலை அடுத்த வைகைநல்லூர் ஊராட்சி, கோட்டைமேடு யூனியன் அலுவலகம் அருகே நடைபெற்ற ஆர்ப்பாட்டத்திற்குக் குளித்தலை கிழக்கு மற்றும் மேற்கு ஒன்றிய திமுக சார்பில் ஒன்றிய செயலாளர் சந்திரன், முன்னாள் ஒன்றிய குழு தலைவர் தியாகராஜன் ஆகியோர் தலைமை வகித்தனர். இதில் குளித்தலை தொகுதி சட்டமன்ற உறுப்பினர் மாணிக்கம் கலந்துகொண்டு உரையாற்றுகையில், கிராமப்புற மக்களின் பொருளாதார முதுகெலும்பாக விளங்கும் இத்திட்டத்தைச் சீர்குலைக்க மத்திய அரசு முயற்சிப்பதாகக் குற்றம் சாட்டினார். அரசு வழக்கறிஞர் நீலமேகம் மற்றும் விசிக கரூர் கிழக்கு மாவட்ட செயலாளர் சக்திவேல் ஆகியோர் கண்டன உரையாற்றினர். மாவட்ட பிரதிநிதி பெரியசாமி நன்றியுரையுடன் நிகழ்வு நிறைவுற்றது.
இதேபோல், கிருஷ்ணராயபுரம் யூனியன் அலுவலகம் முன்பாக நடைபெற்ற ஆர்ப்பாட்டத்திற்கு திமுக மாவட்ட துணை செயலாளர் மகேஸ்வரி தலைமை தாங்கினார். இதில் மேற்கு ஒன்றிய செயலாளர் ரவிராஜா, கிழக்கு ஒன்றிய செயலாளர் கதிரவன், தெற்கு ஒன்றிய செயலாளர் கரிகாலன் மற்றும் கிருஷ்ணராயபுரம் நகர செயலாளர் சசிக்குமார், பழைய ஜெயங்கொண்டம் நகர செயலாளர் மோகன்ராஜ் உள்ளிட்ட முக்கிய நிர்வாகிகள் பங்கேற்றனர். இவர்களுடன் விடுதலை சிறுத்தைகள் கட்சியின் மேற்கு ஒன்றிய செயலாளர் மகாமுனி (எ) வன்னியரசு மற்றும் பல்வேறு கூட்டணிக் கட்சி நிர்வாகிகள் திரளாகக் கலந்துகொண்டனர்.
இந்த ஆர்ப்பாட்டங்களின் போது, “100 நாள் வேலைத் திட்டத்தின் பெயரை உடனடியாகப் பழையபடியே மாற்ற வேண்டும், இத்திட்டத்திற்கான முழு நிதியையும் மத்திய அரசே ஏற்க வேண்டும், தொழிலாளர்களின் ஊதியத்தை உயர்த்தி வழங்க வேண்டும்” உள்ளிட்ட பல்வேறு கோரிக்கைகள் முன்வைக்கப்பட்டன. தமிழகத்தில் பல லட்சம் குடும்பங்கள் இத்திட்டத்தைச் சார்ந்துள்ள நிலையில், மத்திய அரசின் இத்தகைய மாற்றங்கள் கிராமப்புறப் பொருளாதாரத்தைப் பாதிக்கும் எனப் போராட்டக் குழுவினர் எச்சரித்தனர். இரண்டு இடங்களிலும் நடைபெற்ற இந்தப் போராட்டத்தால் அப்பகுதிகளில் சிறிது நேரம் பரபரப்பு நிலவியது.
