மதுரை மாநகரின் கலாச்சார அடையாளங்களில் ஒன்றான காந்தி மியூசியம் மைதானத்தில், 2026-ஆம் புத்தாண்டின் முதல் பெரும் நிகழ்வாக ‘காட்டன் மேளா’ என்னும் வெளிமாநில ஆடைகள் மற்றும் கைவினைப் பொருட்கள் கண்காட்சி கோலாகலமாகத் தொடங்கியுள்ளது. ஆண்டுதோறும் புத்தாண்டு பிறந்தவுடன் மதுரையில் நடத்தப்படும் முதல் கண்காட்சி இது என்பதால், மதுரை மக்களின் பெரும் வரவேற்பைப் பெற்றுள்ள இந்த மேளா, வடமாநிலங்களின் அசல் கலைப் படைப்புகளை நேரடியாகத் தென் தமிழக மக்களுக்குக் கொண்டு சேர்க்கும் ஒரு பாலமாகத் திகழ்கிறது.
இந்த ஆண்டு கண்காட்சியில் இந்தியா முழுவதும் உள்ள கைவினை கலைஞர்கள் மற்றும் நெசவாளர்களின் திறமையை வெளிப்படுத்தும் வகையில் 30-க்கும் மேற்பட்ட பிரம்மாண்ட அரங்குகள் (Stalls) அமைக்கப்பட்டுள்ளன. கண்காட்சியின் நுழைவு வாயிலிலேயே பார்வையாளர்களைக் கவரும் விதமாக, ராஜஸ்தான் மாநிலத்தின் பாரம்பரிய மரச்சாமான் கலைப் பொருட்கள் அணிவகுக்கின்றன. அழகிய வேலைப்பாடுகள் கொண்ட மரத்திலான கபோர்டுகள், நாற்காலிகள், வீட்டு உபயோகப் பொருட்கள், சமையலறை சாதனங்கள் மற்றும் வண்ணமயமான பீங்கான் ஜாடிகள், பூந்தொட்டிகள், விதவிதமான தட்டுகள் மற்றும் மசாஜ் உபகரணங்கள் எனப் பல்வேறு கலைப் பொருட்கள் விற்பனைக்காகக் குவிக்கப்பட்டுள்ளன.
ஆடைப் பிரிவில் குறிப்பாகப் பெண்களைக் கவரும் வகையில் லக்னோவின் புகழ்பெற்ற ‘சிக்கன்காரி’ வேலைப்பாடுகள் கொண்ட சுரிதார்கள், குஜராத்தின் எத்னிக் மற்றும் பிளாக் பிரின்ட் ஆடைகள், ராஜஸ்தானின் பந்தேஜ் ரகங்கள் மற்றும் பஞ்சாபின் பாரம்பரிய பாட்டியாலா, புல்காரி கலைநயமிக்க துணிகள் காட்சிப்படுத்தப்பட்டுள்ளன. மேலும், மத்தியப் பிரதேசத்தின் புகழ்பெற்ற சந்தேரி மற்றும் மகேஸ்வரி சல்வார் ரகங்கள், உயர்தர காட்டன் புடவைகள் என இந்தியாவின் பல மாநிலங்களின் கலாச்சார உடைகளை ஒரே கூரையின் கீழ் மதுரை மக்கள் கண்டு ரசிக்கவும், வாங்கவும் வாய்ப்பு ஏற்படுத்தப்பட்டுள்ளது. வரும் வார இறுதியில் கூட்டம் அதிகமாக இருக்கும் என எதிர்பார்க்கப்படுவதால், கூடுதல் பாதுகாப்பு மற்றும் வாகன நிறுத்துமிட வசதிகளைக் கண்காட்சி ஒருங்கிணைப்பாளர்கள் மேற்கொண்டு வருகின்றனர்.
