மாமல்லபுரம்:
கரூர் வேலுச்சாமிபுரத்தில் கடந்த செப்டம்பர் 27ஆம் தேதி நடந்த தவெக தலைவர் விஜயின் பிரச்சாரத்தின் போது ஏற்பட்ட கூட்ட நெரிசலில் 41 பேர் உயிரிழந்தனர். அந்த துயர சம்பவத்திற்குப் பிறகு கட்சியின் நிர்வாக நடவடிக்கைகள் ஒரு மாதம் தடைப்பட்ட நிலையில், தற்போது மீண்டும் தீவிரமாகத் தொடங்கியுள்ளன.
இதன் பகுதியாக, மாமல்லபுரம் அருகே உள்ள தனியார் அரங்கில் இன்று விஜய் தலைமையில் தமிழக வெற்றிக் கழகத்தின் சிறப்பு பொதுக்குழுக் கூட்டம் நடைபெற்றது. இதில் 2 ஆயிரத்துக்கும் மேற்பட்ட பொதுக்குழு உறுப்பினர்கள் கலந்து கொண்டனர். கூட்டம் தொடங்கியதும், கரூர் நிகழ்வில் உயிரிழந்தோருக்கு மௌன அஞ்சலி செலுத்தப்பட்டது.
தொடர்ந்து கட்சியின் பொதுச் செயலாளர் என். ஆனந்த் உரையாற்றினார். “நாம் கடந்த பாதை எளிதானது அல்ல. பல சோதனைகள், துயரங்கள், தடைகளை தாண்டி வந்துள்ளோம். 30 ஆண்டுகளாக மக்களுடன் இணைந்து செயல்படும் விஜய் இன்று தமிழ்நாட்டு மக்களின் நம்பிக்கையாக இருக்கிறார். 2026-ல் விஜயை முதல்வராக சபதம் ஏற்கச் செய்வோம்” என அவர் உறுதிமொழி அளித்தார்.
பின்னர், கூட்டத் தீர்மானங்கள் வாசிக்க கரூர் மேற்கு மாவட்ட தவெக செயலாளர் வி.பி. மதியழகன் அழைக்கப்பட்டார். கரூர் கூட்ட நெரிசல் வழக்கில் கைதான அவர் தற்போது ஜாமினில் உள்ள நிலையில், மேடையேறியபோது விஜய் அவரை அன்புடன் கட்டியணைத்தார். அதன்போது கூட்டத்தில் இருந்தோர் “கழகத்தின் தியாகி மதியழகன்!” என முழக்கமிட்டனர்.
அந்த உணர்ச்சிகரமான தருணத்தில், மதியழகன் விஜயின் காலில் விழுந்து ஆசீர்வாதம் பெற்றார். பின்னர் முதல் தீர்மானத்தை வாசித்த அவர், “கரூர் கூட்ட நெரிசல் திட்டமிட்ட பாதுகாப்புக் குறைபாடு மற்றும் செயற்கையான குளறுபடிகளால் ஏற்பட்டது. அந்த துயரத்தில் உயிரிழந்தோருக்கு நம் கழகம் ஆழ்ந்த இரங்கலைத் தெரிவித்துக் கொள்கிறது” என்று கூறினார்.
விஜயின் அன்பும் ஆதரவும் வெளிப்பட்ட அந்த நிமிடம், தவெக பொதுக்குழுவில் கலந்து கொண்ட அனைவரின் மனதிலும் ஆழமான தாக்கத்தை ஏற்படுத்தியது.
