கோவையில் கடந்த 2021-ம் ஆண்டு நடைபெற்ற இளம்பெண் கொலை வழக்கில், குற்றவாளி ஜெகனுக்கு ஆயுள் தண்டனை விதித்து கோவை அனைத்து மகளிர் நீதிமன்றம் அதிரடி தீர்ப்பு வழங்கியுள்ளது. புதுக்கோட்டை மாவட்டம் அறந்தாங்கியைச் சேர்ந்த ஜெகன், தனது மனைவியுடன் கோவையில் தங்கி தனியார் நிறுவனத்தில் வேலை பார்த்து வந்தார். ஜெகனின் மனைவி சாய்பாபா காலனியில் உள்ள ஒரு பழக்கடையில் வேலை பார்த்தபோது, அங்கு சக ஊழியராக இருந்த ஒரு இளம் பெண்ணுடன் தோழியானார். இந்தத் தோழமை மூலம் ஜெகனுக்கும் அந்தப் பெண்ணுக்கும் பழக்கம் ஏற்பட்டுள்ளது.
ஜெகன் அந்த இளம்பெண்ணுடன் அடிக்கடி தொலைபேசியில் பேசி வந்ததால், அவரது குடும்பத்தில் தகராறு ஏற்பட்டுள்ளது. இந்நிலையில், கடந்த 2021-ம் ஆண்டு தனது பிறந்தநாளன்று அந்த இளம்பெண் வழங்கிய கைக்கடிகாரத்தைப் பெற்றுக்கொண்ட ஜெகன், அந்தப் பெண் வீட்டில் தனியாக இருந்த சமயம் பார்த்து அங்கு சென்றுள்ளார். “என் மனைவியை விவாகரத்து செய்துவிட்டு உன்னைத் திருமணம் செய்துகொள்கிறேன்” என ஜெகன் கூறிய ஆசை வார்த்தையை அந்தப் பெண் கடுமையாக எதிர்த்துள்ளார். மேலும், ஜெகனை வீட்டை விட்டு வெளியேறுமாறு எச்சரித்துள்ளார்.
இதனால் ஆத்திரமடைந்த ஜெகன், அந்த இளம்பெண்ணைக் கொடூரமாகப் பாலியல் வன்கொடுமை செய்ததோடு, கழுத்தை நெரித்துக் கொலை செய்துவிட்டுத் தப்பியோடினார். உயிரிழந்த பெண்ணின் தங்கை வீடு திரும்பியபோது அக்கா பிணமாகக் கிடப்பதைக் கண்டு அதிர்ச்சியடைந்தார். முதலில் சந்தேக மரணம் எனப் பதிவு செய்யப்பட்ட இந்த வழக்கில், பிரேதப் பரிசோதனை அறிக்கை வந்த பிறகு கொலை மற்றும் கற்பழிப்புப் பிரிவுகள் சேர்க்கப்பட்டன. தனிப்படை போலீசார் கண்காணிப்பு கேமரா (CCTV) காட்சிகளை ஆய்வு செய்தபோது, ஜெகன் அந்தப் பெண்ணின் வீட்டுக்கு வந்து சென்றது உறுதியானது. இதனையடுத்து அவரைக் கைது செய்து போலீசார் விசாரணை நடத்தினர்.
இந்த வழக்கு கோவை அனைத்து மகளிர் நீதிமன்றத்தில் நீதிபதி சுந்தரராஜன் முன்னிலையில் விசாரணைக்கு வந்தது. அனைத்து சாட்சியங்கள் மற்றும் ஆதாரங்களை விசாரித்த நீதிபதி, ஜெகன் மீதான குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டதால், அவருக்கு ஆயுள் தண்டனை விதித்து இன்று தீர்ப்பளித்தார். பெண்களுக்கு எதிரான இத்தகைய கொடூரச் செயலில் ஈடுபட்டவருக்குக் கடுமையான தண்டனை வழங்கப்பட்டிருப்பது சமூக ஆர்வலர்களிடையே வரவேற்பைப் பெற்றுள்ளது.
