2026 சட்டமன்றத் தேர்தலை முன்னிட்டு, திமுக வட்டாரங்களில் தேர்தல் பணிகள் வேகமெடுத்து வருகின்றன. இதில், தூத்துக்குடி மாவட்டத்தைச் சேர்ந்த அமைச்சரும் திமுகவின் முக்கிய முகாமையாளருமான கீதா ஜீவன், மகளிர் உரிமைத் தொகைத் திட்டத்தை நினைவூட்டி வாக்காளர்களை அணுகும் புதிய முயற்சியில் இறங்கியுள்ளார்.
மகளிர் உரிமைத் தொகைத் திட்டம், தமிழக அரசின் முக்கிய நலத்திட்டங்களில் ஒன்றாகப் பார்க்கப்படுகிறது. தற்போது இந்த திட்டத்தின் கீழ் சுமார் 1 கோடி 15 லட்சம் பெண்கள் பயனடைந்துவருகின்றனர். மேலும் தகுதி பெற்ற அனைவருக்கும் விரைவில் தொகை வழங்கப்படும் என அரசு அறிவித்துள்ளது.
இதனை முன்னிட்டு, கீதா ஜீவன் தன் சட்டப்பேரவைத் தொகுதிக்குட்பட்ட பெண் வாக்காளர்களுக்கு தனிப்பட்ட தபால் அனுப்பி, திட்டத்தின் பயன்களை நினைவூட்டும் நடவடிக்கையில் ஈடுபட்டுள்ளார். தபால் மூலம் அனுப்பப்பட்ட கடிதத்தில்,
“முதலமைச்சர் மு.க.ஸ்டாலின் தலைமையில் திராவிட மாடல் ஆட்சி அனைத்து நலத்திட்டங்களையும் மக்களின் வீடுகளுக்கே கொண்டு சென்றுள்ளது. பெண்களின் பொருளாதார வலிமையை உறுதிசெய்யும் மகளிர் உரிமைத் தொகைத் திட்டம், உங்கள் வாழ்க்கையில் ஒளி ஏற்றியிருப்பதை அறிந்து மகிழ்ச்சி. இதேபோல தொடர்ந்த நலத்திட்டங்களுக்கு 2026 தேர்தலில் திமுகவுக்கு ஆதரவு அளிக்க வேண்டும்,” என குறிப்பிடப்பட்டுள்ளது.
இந்த முயற்சி மகளிரிடையே பெரும் வரவேற்பை பெற்றுள்ளதாகத் தெரிவிக்கப்படுகிறது. மேலும் இதே பாணியில் தபால் மூலம் வாக்காளர்களை அணுகும் திட்டத்தை மற்ற அமைச்சர்களும் பரிசீலித்து வருவதாக தகவல்.
மகளிர் உரிமைத் தொகை அடுத்த கட்ட பணிகள் டிசம்பர் 15ஆம் தேதி வரை நிறைவு செய்யப்படும் என எதிர்பார்க்கப்படுகின்றது. இதனால், இதுவரை தொகை பெறாத பெண்களுக்கும் இம்முறை நிதி உதவி வழங்கப்படும் என்ற நம்பிக்கை வட்டாரங்களில் நிலவுகிறது.
