தமிழக மகளிருக்கு நம்பிக்கை ஊட்டும் செய்தியாக, கலைஞர் மகளிர் உரிமைத் தொகை திட்டத்தின் கீழ் புதிய பயனாளிகளுக்கும் விரைவில் உதவித்தொகை வழங்கப்படும் என துணை முதலமைச்சர் உதயநிதி ஸ்டாலின் தெரிவித்துள்ளார்.
2023 செப்டம்பர் மாதம் முதல் நடைமுறைக்கு வந்த இந்தத் திட்டம், மாதந்தோறும் குடும்பத் தலைவிகளுக்கு ரூ.1,000 வழங்கி, அவர்களின் வாழ்வாதாரத்தை உயர்த்த முக்கிய பங்கு வகித்து வருகிறது. தற்போது தமிழகத்தில் 1 கோடியே 20 இலட்சம் பெண்கள் இந்தத் திட்டத்தின் பயனாளிகளாக உள்ளனர்.
முதலில் விண்ணப்பித்த சிலர் தகுதி விவகாரங்களால் பட்டியலில் சேர முடியாமல் போனதால், அரசு புதிதாக “உங்களுடன் ஸ்டாலின்” முகாம்களின் மூலம் புதிய மனுக்கள் பெற தொடங்கியது. இதுவரை 15 லட்சத்திற்கும் மேற்பட்ட புதிய விண்ணப்பங்கள் பரிசீலனையில் உள்ளன.
இந்த நிலையில் திண்டுக்கல்லில் நடைபெற்ற நிகழ்ச்சியில் பேசிய உதயநிதி ஸ்டாலின் கூறியதாவது :
“மகளிர் நலனுக்காக எங்கள் அரசு எண்ணற்ற திட்டங்களை முன்னெடுத்து வருகிறது. அரசு பேருந்துகளில் மட்டும் மகளிர் 800 கோடி பயணங்களை மேற்கொண்டுள்ளனர். கலைஞர் மகளிர் உரிமைத் திட்டத்தின் கீழ் ஏற்கனவே 1 கோடியே 20 இலட்சம் பேருக்கு மாதம் ரூ.1000 வழங்கப்பட்டு வருகிறது. இன்னும் இரண்டு மாதங்களில் அனைத்து தகுதியான மகளிருக்கும் உதவித்தொகை வழங்க நடவடிக்கை எடுக்கப்படும்,” என்றார்.
அரசு வட்டாரங்களின் தகவலின்படி, புதிதாக விண்ணப்பித்தவர்களின் ஆவண சரிபார்ப்பு பணிகள் விரைவில் நிறைவடைய உள்ளன. எனவே, அடுத்த இரண்டு மாதங்களில் புதிய பயனாளிகளின் வங்கி கணக்குகளிலும் ரூ.1,000 தொகை வரவாகக் கிடைக்கும் என எதிர்பார்க்கப்படுகிறது.
மொத்தத்தில், மகளிர் உரிமைத் திட்டம் தமிழக அரசின் மகளிர் நலக் கொள்கையின் அடையாளமாக மாறியுள்ளதோடு, விரைவில் மேலும் பல குடும்பத் தலைவிகளுக்கு நம்பிக்கை நிதி ஆகும் என தெரிவிக்கப்பட்டுள்ளது.
