தமிழக அரசியல் களத்தில் அடுத்தடுத்த அதிரடி மாற்றங்கள் நிகழ்ந்து வரும் சூழலில், அதிமுகவின் முன்னாள் நிர்வாகியும், நட்சத்திரப் பேச்சாளருமான பெங்களூரு புகழேந்தி, “புரட்சி அண்ணா திராவிட முன்னேற்றக் கழகம்” (புஅதிமுக) என்ற பெயரில் புதிய அரசியல் கட்சியைத் தொடங்கி, எடப்பாடி பழனிசாமி தலைமையிலான அதிமுகவுக்கு நேரடி சவால் விடுத்துள்ளார். சசிகலாவின் தீவிர ஆதரவாளராக இருந்து, பின்னர் அமமுகவின் கர்நாடக மாநிலச் செயலாளராகப் பணியாற்றி, ஓபிஎஸ் அணியில் ஐக்கியமான புகழேந்தி, தற்போது தனிப் பாதை வகுத்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
சமீபத்தில் ஓ.பன்னீர்செல்வம் திமுகவுக்கு ஆதரவான நிலைப்பாட்டை எடுத்ததை விமர்சித்து அவரிடமிருந்து விலகிய புகழேந்தி, தற்போது தனது புதிய கட்சியின் கொள்கை மற்றும் இலக்குகளைச் செய்தியாளர்கள் சந்திப்பில் அறிவித்தார். அப்போது அவர் பேசுகையில், “அதிமுக இன்று தனது தன்மானத்தை அடகு வைத்துவிட்டு நிற்கிறது. டெல்லிக்குச் சென்று பாஜக தலைவர்களிடம் தொகுதிகளுக்காக எடப்பாடி பழனிசாமி கெஞ்சிக் கொண்டிருக்கிறார். இது அண்ணா மற்றும் ஜெயலலிதா கட்டிக்காத்த இயக்கத்திற்கு இழைக்கப்படும் துரோகம். வரும் தேர்தலில் அதிமுக போட்டியிடும் அனைத்துத் தொகுதிகளிலும் அவர்களை டெபாசிட் இழக்கச் செய்வதே எங்களது ‘புஅதிமுக’-வின் முதல் வேலையாக இருக்கும்” என ஆவேசமாகத் தெரிவித்தார்.
தனது அரசியல் பயணத்தில் பல்வேறு ஏற்ற இறக்கங்களைக் கண்ட புகழேந்தி, டிடிவி தினகரன் மற்றும் ஓபிஎஸ் ஆகியோருடன் ஏற்பட்ட கருத்து வேறுபாடுகளுக்குப் பிறகு, தொண்டர்களின் விருப்பப்படியே இந்த புதிய கட்சியைத் தொடங்கியுள்ளதாகக் குறிப்பிட்டார். “தேவைப்பட்டால் வரும் சட்டமன்றத் தேர்தலில் எங்களது கட்சி தனித்தோ அல்லது கூட்டணி அமைத்தோ போட்டியிடும். காலம் மிகக் குறைவாக இருப்பதால், விரைவில் கட்சியின் பொதுக்குழுவைக் கூட்டி, கூட்டணி குறித்த இறுதி முடிவை முறைப்படி அறிவிப்போம்” என்றும் அவர் கூறினார்.
அதிமுகவின் வாக்கு வங்கியைப் பிரிக்கும் நோக்கில் இந்தப் புதிய கட்சி தொடங்கப்பட்டுள்ளதா என்ற கேள்விக்கு, “உண்மையான அதிமுக தொண்டர்கள் என் பக்கம் இருக்கிறார்கள்” என அவர் பதிலளித்தார். எடப்பாடி பழனிசாமி தலைமையிலான அதிமுகவை வீழ்த்துவதையே ஒற்றை இலக்காகக் கொண்டு களம் இறங்கியுள்ள பெங்களூரு புகழேந்தியின் இந்த நகர்வு, குறிப்பாக தென் மாவட்டங்கள் மற்றும் கொங்கு மண்டல அதிமுகவினரிடையே எந்த மாதிரியான தாக்கத்தை ஏற்படுத்தும் என்பது அரசியல் ஆய்வாளர்களிடையே விவாதப் பொருளாக மாறியுள்ளது.