அறிவாற்றலை வளர்த்துக்கொள்ள மடிக்கணினிகளை நல்வழியில் பயன்படுத்துங்கள் கே.கே.எஸ்.எஸ்.ஆர். ராமச்சந்திரன் அறிவுரை!

தமிழக அரசின் “உலகம் உங்கள் கையில்” திட்டத்தின் கீழ், மாணவ-மாணவியரின் கல்வித் தரத்தை மேம்படுத்தும் நோக்கில் வழங்கப்படும் விலையில்லா மடிக்கணினிகள் வழங்கும் விழா, விருதுநகர் மாவட்டம் அருப்புக்கோட்டையில் உள்ள மூன்று முக்கியக் கல்வி நிறுவனங்களில் நேற்று மிகச் சிறப்பாக நடைபெற்றது. தமிழக வருவாய் மற்றும் பேரிடர் மேலாண்மைத் துறை அமைச்சர் கே.கே.எஸ்.எஸ்.ஆர். ராமச்சந்திரன் இவ்விழாக்களில் கலந்துகொண்டு மாணவர்களுக்கு மடிக்கணினிகளை வழங்கிச் சிறப்புரையாற்றினார்.

அருப்புக்கோட்டை எஸ்.பி.கே. கல்லூரி, பாளையம்பட்டியில் உள்ள அரசு தொழிற்பயிற்சி நிலையம் (ITI) மற்றும் தேவாங்கர் கலைக் கல்லூரி ஆகிய மூன்று இடங்களில் இந்த மடிக்கணினி வழங்கும் நிகழ்ச்சிகள் ஒருங்கிணைக்கப்பட்டன. எஸ்.பி.கே. கல்லூரியில் நடைபெற்ற விழாவிற்கு அருப்புக்கோட்டை நாடார்கள் உறவின்முறைத் தலைவர் சுதாகர் தலைமை தாங்கினார். கல்லூரிச் செயலர் ஆசைத்தம்பி மற்றும் தலைவர் மயில் ராஜன் ஆகியோர் முன்னிலை வகித்தனர்.

நிகழ்ச்சியில் மாணவர்களிடையே மடிக்கணினிகளை வழங்கி அமைச்சர் பேசியதாவது: “தமிழக முதலமைச்சர் மு.க.ஸ்டாலின் அவர்கள், மாணவர்கள் உலகளாவிய அறிவைப் பெற வேண்டும் என்பதற்காகவே ‘உலகம் உங்கள் கையில்’ என்ற உன்னதத் திட்டத்தைச் செயல்படுத்தி வருகிறார். மாணவர்கள் பல நல்ல விஷயங்களைக் கற்றுக்கொண்டு, கல்வியில் சிறந்து விளங்க வேண்டும் என்பதே இந்த அரசின் எண்ணம். உங்களுக்குக் கிடைத்துள்ள இந்த மடிக்கணினிகளைத் தவறான வழிகளில் பயன்படுத்தாமல், நற்பயன் தரும் விஷயங்களுக்கு மட்டுமே பயன்படுத்தி உங்கள் அறிவுத்திறனை வளர்த்துக்கொள்ள வேண்டும். இந்தியாவிலேயே தமிழகத்திற்குத் தான் தற்போது அதிக அளவில் தொழில் முதலீடுகள் மற்றும் நிதிகள் ஈர்க்கப்பட்டுள்ளன. இதன் மூலம் எதிர்காலத்தில் உங்களுக்குப் பிரகாசமான வேலைவாய்ப்புகள் காத்திருக்கின்றன,” என ஊக்கமளிக்கும் வகையில் உரையாற்றினார்.

இந்த விழாக்களில் அருப்புக்கோட்டை வருவாய் கோட்டாட்சியர் மாரிமுத்து, தாசில்தார் செந்தில் வேல், நகராட்சி ஆணையாளர் ராஜமாணிக்கம், முன்னாள் ஒன்றிய பெருந்தலைவர் சுப்பாராஜ், முன்னாள் நகரமன்றத் தலைவர் சிவபிரகாசம் உள்ளிட்ட அரசு உயர் அலுவலர்கள் பலர் கலந்துகொண்டனர். மேலும், வட்டார வளர்ச்சி அலுவலர் காஜா மைதீன் பந்தே நவாஸ், நகரக் கழகச் செயலாளர் ஏ.கே. மணி, ஒன்றிய கழகச் செயலாளர்கள் பாலகணேஷ், பொன்ராஜ் மற்றும் அரசினர் தொழிற்பயிற்சி நிலைய முதல்வர் மாரீஸ்வரன், தேவாங்கர் கல்லூரி முதல்வர் உமாராணி உள்ளிட்ட கல்வி நிறுவனங்களின் நிர்வாகிகளும் பேராசிரியர்களும் திரளாகப் பங்கேற்றனர்.