மதுரை திருப்பரங்குன்றம் மலையுச்சியில் உள்ள தீபத்தூணில் கார்த்திகை தீபம் ஏற்ற அனுமதி கோரி, நீதிமன்ற உத்தரவை அமல்படுத்த வலியுறுத்தி தீக்குளித்து உயிர்நீத்த பக்தர் பூர்ணசந்திரனின் மறைவு மதுரையில் பெரும் சோகத்தையும் கொந்தளிப்பையும் ஏற்படுத்தியுள்ளது. இந்நிலையில், மதுரை நரிமேடு பகுதியில் உள்ள பூர்ணசந்திரனின் இல்லத்திற்குச் சென்ற சரவணா மருத்துவமனை நிறுவனரும், முன்னாள் சட்டமன்ற உறுப்பினருமான டாக்டர் பா. சரவணன், அன்னாரது உடலுக்கு மாலை அணிவித்து மலரஞ்சலி செலுத்தினார். நீதிமன்றம் உத்தரவிட்டும் அதனைச் செயல்படுத்த முன்வராத தமிழக அரசின் பிடிவாதமே இத்தகைய துயரமான தியாகத்திற்குக் காரணம் எனத் தெரிவித்த அவர், உயிரிழந்தவரின் குடும்பத்தினர் மற்றும் உறவினர்களை நேரில் சந்தித்துத் தனது ஆழ்ந்த இரங்கலையும் ஆறுதலையும் பகிர்ந்துகொண்டார்.
திருப்பரங்குன்றம் கோயிலின் தொன்மையான வழிபாட்டு உரிமைகளை மீட்டெடுக்கக் கோரி நடைபெற்ற இந்தப் போராட்டத்தின் விபரீத முடிவு, தமிழகம் முழுவதும் உள்ள ஆன்மீகப் பெரியோர்களிடையே அதிர்ச்சியை ஏற்படுத்தியுள்ளது. அஞ்சலி செலுத்திய பின் செய்தியாளர்களிடம் பேசிய டாக்டர் பா. சரவணன், பக்தர்களின் உணர்வுகளை அரசு மதிக்கத் தவறியதாலேயே ஒரு உயிர் பறிபோயிருப்பதாகக் குற்றம் சாட்டினார். பூர்ணசந்திரனின் இந்தத் தியாகம் வீண்போகக் கூடாது என்றும், இனியாவது நீதிமன்ற உத்தரவின்படி தீபத்தூணில் கார்த்திகை தீபம் ஏற்ற அரசு உரிய நடவடிக்கை எடுக்க வேண்டும் என்றும் அவர் வலியுறுத்தினார். இச்சம்பவம் தொடர்பாக அப்பகுதியில் பதற்றம் நிலவுவதால், முன்னெச்சரிக்கையாகக் காவல்துறைப் பாதுகாப்பு பலப்படுத்தப்பட்டுள்ளது.
