தேனி மாவட்டம் போடிநாயக்கனூர் நகராட்சிப் பகுதியில் அமைந்துள்ள மிகவும் பழமை வாய்ந்த மற்றும் பிரசித்தி பெற்ற பரமசிவன் திருக்கோயிலுக்குச் செல்லும் பிரதான சாலை, கடந்த நீண்ட காலமாக முறையான பராமரிப்பின்றி குண்டும் குழியுமாக காட்சி அளித்தது. இதனால் கோயிலுக்கு வரும் பக்தர்கள் மற்றும் அப்பகுதி பொதுமக்கள் மிகுந்த சிரமத்திற்கு உள்ளாகி வந்தனர். இந்தச் சாலையை உடனடியாகச் சீரமைத்து புதிய தார்ச்சாலை அமைத்துத் தர வேண்டும் என்று கோயில் நிர்வாகம் மற்றும் பொதுமக்கள் தரப்பில் வைக்கப்பட்ட நீண்ட காலக் கோரிக்கையை ஏற்று, நகராட்சி நிர்வாகம் தற்போது அதற்கான பணிகளை முடுக்கிவிட்டுள்ளது. நகராட்சி ஆணையாளர் சுதா, பொறியாளர் வி.குணசேகரன் மற்றும் நகர்மன்றத் தலைவர் ராஜராஜேஸ்வரி சங்கர் ஆகியோரின் நேரடி மேற்பார்வையில், நகராட்சி நிதியிலிருந்து தரமான தார்ச்சாலை அமைக்கும் பணிகள் தற்போது முழுவீச்சில் நடைபெற்று வருகின்றன.
இந்நிலையில், நடைபெற்று வரும் இந்தப் புதிய தார்ச்சாலை அமைக்கும் பணிகளை தேனி வடக்கு மாவட்ட திமுக செயலாளரும், தேனி நாடாளுமன்ற உறுப்பினருமான தங்க தமிழ்ச்செல்வன் இன்று நேரில் சென்று பார்வையிட்டு ஆய்வு செய்தார். அப்போது சாலையின் தரம், பயன்படுத்தப்படும் மூலப்பொருட்களின் அளவு மற்றும் சாலையின் ஆயுட்காலம் குறித்து அதிகாரிகளிடம் விரிவாகக் கேட்டறிந்தார். பணிகளை மேற்கொண்டு வரும் ஒப்பந்ததாரர்களிடம் பேசிய அவர், பொதுமக்கள் மற்றும் பக்தர்களின் நலன் கருதி அமைக்கப்படும் இந்தச் சாலை எவ்வித குறைபாடுமின்றி மிகத் தரமானதாக இருக்க வேண்டும் என்றும், நிர்ணயிக்கப்பட்ட காலத்திற்குள் பணிகளை முடித்து மக்கள் பயன்பாட்டிற்கு வழங்க வேண்டும் என்றும் அறிவுறுத்தினார்.
இந்த ஆய்வின் போது, போடி நகராட்சி நகர்மன்றத் தலைவர் ராஜராஜேஸ்வரி சங்கர், நகராட்சி ஆணையாளர் சுதா, பொறியாளர் வி.குணசேகரன், மேலாளர் ஜலாலுதீன் மற்றும் திமுக நகரச் செயலாளர் ஆர். புருஷோத்தமன் ஆகியோர் உடனிருந்தனர். மேலும், சுகாதார அலுவலர் மணிகண்டன், கட்டிட ஆய்வாளர் சுகதேவ் உள்ளிட்ட நகராட்சி அலுவலர்கள் மற்றும் முக்கியப் பிரமுகர்கள் பலரும் இந்த ஆய்வின் போது பங்கேற்றனர். நீண்ட காலத்திற்குப் பிறகு பரமசிவன் கோயிலுக்குச் செல்லும் சாலை சீரமைக்கப்படுவது அப்பகுதி மக்களிடையே மிகுந்த மகிழ்ச்சியை ஏற்படுத்தியுள்ளது. தொகுதி முழுவதும் நிலுவையில் உள்ள இது போன்ற உட்கட்டமைப்புப் பணிகளை விரைந்து முடிக்கத் தாம் நடவடிக்கை எடுத்து வருவதாக எம்பி தங்க தமிழ்ச்செல்வன் இந்த ஆய்வின் போது தெரிவித்தார்.