தேனி மாவட்ட ஆட்சியர் அலுவலகம் முன்பாக இன்று சி.ஐ.டி.யு., அங்கன்வாடி ஊழியர்கள் மற்றும் உதவியாளர்கள் சங்கம் சார்பில் கோரிக்கைகளை வலியுறுத்தி நடைபெற்ற அதிரடி சாலை மறியல் போராட்டத்தால் பெரும் பரபரப்பு ஏற்பட்டது. அங்கன்வாடி பணியாளர்களைப் பணி வரன்முறை செய்து அரசு ஊழியர்களாக அறிவிக்க வேண்டும், நீண்டகாலமாக நிலுவையில் உள்ள காலிப் பணியிடங்களை உடனடியாக நிரப்ப வேண்டும் மற்றும் தேர்தல் பணிகளான பி.எல்.ஓ., (BLO) பணிகளில் இருந்து தங்களை முழுமையாக விடுவிக்க வேண்டும் உள்ளிட்ட பல்வேறு கோரிக்கைகளை முன்வைத்து இந்தப் போராட்டம் முன்னெடுக்கப்பட்டது. மாவட்டத் தலைவர் சாந்தியம்மாள் தலைமையில் நடைபெற்ற இந்த மறியலில், மாநிலத் துணைச் செயலாளர் நாகலட்சுமி, மாவட்ட நிர்வாகிகள் வளர்மதி, நாகலட்சுமி மற்றும் சி.ஐ.டி.யு., மாவட்டத் தலைவர் ஜெயபாண்டி உள்ளிட்ட முக்கிய நிர்வாகிகள் முன்னிலை வகித்தனர்.
ஆட்சியர் அலுவலகம் அமைந்துள்ள பிரதான சாலையில் ஊழியர்கள் திடீரென அமர்ந்து மறியலில் ஈடுபட்டதால் போக்குவரத்து முற்றிலுமாகப் பாதிக்கப்பட்டது. இதனைத் தொடர்ந்து பாதுகாப்புப் பணியிலிருந்த போலீசார், மறியலில் ஈடுபட்டவர்களை அப்புறப்படுத்த முயன்றபோது இருதரப்பினரிடையே வாக்குவாதம் ஏற்பட்டது. இறுதியில், போராட்டத்தில் ஈடுபட்ட 299 பேரை போலீசார் அதிரடியாகக் கைது செய்தனர். கைது செய்யப்பட்டவர்களை அழைத்துச் செல்ல அரசுப் பேருந்துகள் மற்றும் காவல்துறை வாகனங்கள் பயன்படுத்தப்பட்டன. இதில் ஒரு காவல்துறை வாகனம் நடுவழியில் பழுதாகி நின்றதால், சில ஊழியர்களை ஆட்டோக்களில் ஏற்றிச் செல்ல வேண்டிய இக்கட்டான சூழல் போலீசாருக்கு ஏற்பட்டது. கைது செய்யப்பட்ட அனைவரும் அருகில் உள்ள தனியார் திருமண மண்டபத்தில் தங்க வைக்கப்பட்டனர்.
இந்தப் போராட்டத்தின் விளைவாக தேனி மாவட்டத்தின் பல்வேறு பகுதிகளில் உள்ள அங்கன்வாடி மையங்கள் இன்று செயல்படவில்லை. ஊழியர்கள் மற்றும் உதவியாளர்கள் பெருமளவில் திரண்டு போராட்டத்தில் பங்கேற்றதால், மையங்களுக்கு வந்த குழந்தைகளுக்கு உணவளிப்பதிலும், பராமரிப்பதிலும் சிக்கல் ஏற்பட்டது. தங்களது கோரிக்கைகள் பலமுறை அரசிடம் முறையிடப்பட்டும் இதுவரை முறையான தீர்வு கிடைக்கவில்லை என்றும், அரசு உடனடியாகப் பேச்சுவார்த்தை நடத்திப் பணிப் பாதுகாப்பை உறுதி செய்ய வேண்டும் என்றும் போராட்டக் குழுவினர் வலியுறுத்தினர். கோரிக்கைகள் நிறைவேற்றப்படாத பட்சத்தில் போராட்டத்தைத் தீவிரப்படுத்தப் போவதாகவும் அவர்கள் எச்சரித்துள்ளனர்.
