வளர்ச்சியின் அச்சாணி நடுத்தர வர்க்கம்: இந்தியாவை வல்லரசாக்கும் பட்ஜெட்டின் ‘மாஸ்டர் பிளான்’!

நடப்பு பிப்ரவரி 1-ம் தேதி நாடாளுமன்றத்தில் தாக்கல் செய்யப்பட்ட 2026-27 நிதியாண்டுக்கான மத்திய பட்ஜெட், இந்தியாவின் பாரம்பரிய நிதிச் சிந்தனையிலிருந்து ஒரு புரட்சிகரமான மாற்றத்தை வெளிப்படுத்தியுள்ளதாக மதுரை டோக் பெருமாட்டி கல்லூரி பொருளாதாரத் துறை உதவிப் பேராசிரியர் அனிதா செல்வராஜ் பாராட்டு தெரிவித்துள்ளார். வரி குறைப்புகளை மட்டுமே ஒரு பட்ஜெட்டின் வெற்றியாகக் கருதாமல், வேலைவாய்ப்பை வலுப்படுத்துதல், சிக்கலான நடைமுறைகளை எளிதாக்குதல் மற்றும் சாமானிய மக்கள் செல்வம் ஈட்டுவதற்கான புதிய வழிகளைத் திறத்தல் போன்ற நீடித்த பொருளாதார உத்திகளை இந்த முறை அரசாங்கம் கையில் எடுத்துள்ளது. தெளிவான நடவடிக்கை, சீர்திருத்தம் மற்றும் மக்கள் மையமாக்கல் என்ற முப்பெரும் நோக்கத்துடன், இந்தியப் பொருளாதாரத்தின் முதுகெலும்பாக விளங்கும் ஊதியப் பணியாளர்கள், சிறு தொழில் முனைவோர் மற்றும் இளைய தலைமுறையினரின் நீண்டகால எதிர்பார்ப்புகளை இந்த பட்ஜெட் நேரடியாக நிவர்த்தி செய்வதாக அவர் குறிப்பிட்டுள்ளார்.

இந்த பட்ஜெட்டின் ஒரு முக்கிய தூணாக சேவைத் துறையின் பிரம்மாண்ட விரிவாக்கம் அமைந்துள்ளது. குறிப்பாக சுகாதாரம் மற்றும் கல்வி தொழில்நுட்பம் (EdTech) போன்ற துறைகளுக்கு முன்னெப்போதும் இல்லாத வகையில் அதிக முக்கியத்துவம் அளிக்கப்பட்டுள்ளது. நாட்டில் ஐந்து சர்வதேச தரத்திலான மருத்துவ சுற்றுலா மையங்களை உருவாக்குதல் மற்றும் 10 முக்கிய துறைகளில் அடுத்தநிலை சுகாதார நிபுணர்களை (Para-professionals) உருவாக்குவது போன்ற தொலைநோக்கு திட்டங்கள் இந்தியாவை உலகளாவிய சுகாதார மையமாக மாற்றும் என்பதில் ஐயமில்லை. இது நடுத்தர வர்க்க குடும்பங்களுக்கு இரட்டை நன்மையை வழங்குகிறது; சுமார் 1.5 லட்சம் பராமரிப்பாளர்களுக்கு (Caregivers) நவீன பயிற்சி அளிப்பதன் மூலம் கௌரவமான வேலைவாய்ப்புகள் உருவாக்கப்படுவதோடு, முதியோர் பராமரிப்புக்கான குடும்பச் செலவுகளும் கணிசமாகக் குறையும் சூழல் உருவாகியுள்ளது.

கல்வித் துறையைப் பொறுத்தமட்டில், மேற்கொள்ளப்பட்டுள்ள சீர்திருத்தங்கள் நடுத்தர வர்க்கத்தினரின் முன்னுரிமைகளை அப்படியே பிரதிபலிக்கின்றன. மேல்நிலைப் பள்ளிகளில் 15,000 அனிமேஷன் மற்றும் கேமிங் ஆய்வகங்களை அமைத்தல், 5 பிரத்யேக பல்கலைக்கழக நகரங்களை (University Cities) உருவாக்குதல் போன்றவை தரமான கல்வியை எளிய மக்களுக்கும் மலிவு விலையில் கொண்டு சேர்க்கும். இதன் மூலம் விலையுயர்ந்த பெருநகர கல்வி நிறுவனங்களை மட்டுமே சார்ந்திருக்கும் கட்டாயம் நடுத்தர வர்க்கத்தினருக்கு குறையும். மேலும், தகவல் தொழில்நுட்பத் துறைக்கான வரி சலுகைகள் மற்றும் கிளவுட் சேவைகளுக்கான வரி விடுமுறைகள் அறிவுத் தொழிலாளர்களின் பொருளாதார வளர்ச்சியை ஊக்குவித்து, அவர்களின் வேலை பாதுகாப்பை உறுதி செய்யும்.

நிர்வாக ரீதியான சிக்கல்களைக் களைவதிலும் இந்த பட்ஜெட் முத்திரை பதித்துள்ளது. வருமான வரி தாக்கல் செய்வதற்கான காலக்கெடுவை மார்ச் 31 வரை நீட்டித்தது, சிறு வரி செலுத்துவோருக்கான சான்றிதழ் நடைமுறைகளை தானியங்குபடுத்தியது (Automation), மற்றும் உயர் கல்வி மற்றும் வெளிநாட்டு மருத்துவ சிகிச்சைக்கான டிசிஎஸ் (TCS) வரியை 5 சதவீதத்திலிருந்து 2 சதவீதமாகக் குறைத்தது போன்றவை சாமானிய மக்களின் நிதிச் சுமையை வெகுவாகக் குறைத்துள்ளன. சிறு வணிகர்களுக்கு மூலதனம் எளிதாகக் கிடைக்க 10,000 கோடி ரூபாய் வளர்ச்சி நிதி ஒதுக்கப்பட்டிருப்பது தொழில் துறையில் புதிய உத்வேகத்தை ஏற்படுத்தும். முதலீடு மற்றும் உள்கட்டமைப்பைப் பொறுத்தவரை, பொது மூலதனச் செலவினங்களுக்காக ஒதுக்கப்பட்ட 12.2 லட்சம் கோடி ரூபாய் மற்றும் நகராட்சி பத்திரங்களுக்கான புதிய ஊக்குவிப்புகள், இரண்டாம் மற்றும் மூன்றாம் கட்ட நகரங்களின் வளர்ச்சியை வேகப்படுத்தும். அதிவேக ரயில் நடைபாதைகள் மற்றும் மலிவு விலை வீட்டுவசதித் திட்டங்கள் மூலம் நடுத்தர வர்க்கத்தினர் நாட்டின் முன்னேற்றத்தில் ஒரு முக்கிய பங்குதாரராக மாற்றப்பட்டுள்ளனர் என்று பேராசிரியர் அனிதா செல்வராஜ் தனது ஆய்வில் விரிவாகத் தெரிவித்துள்ளார்.