நாமக்கல் மாவட்டம் குமாரபாளையத்தில் விளையாடிக் கொண்டிருந்த ஏழு வயது சிறுமி பாலியல் வன்கொடுமைக்கு ஆளாக்கப்பட்ட சம்பவம் தமிழகம் முழுவதும் பெரும் அதிர்வலைகளை ஏற்படுத்தியுள்ளது. உலக மகளிர் தினமான இன்று, பெண் குழந்தைகளின் பாதுகாப்பு கேள்விக்குறியாகியுள்ளதைச் சுட்டிக்காட்டி, அண்ணா திமுக பொதுச்செயலாளரும் சட்டமன்ற எதிர்க்கட்சித் தலைவருமான எடப்பாடி கே. பழனிசாமி தமிழக அரசுக்குக் கடும் கண்டனம் தெரிவித்துள்ளார். இச்சம்பவம் குறித்து அவர் வெளியிட்டுள்ள எக்ஸ் (X) சமூக வலைதளப் பதிவில், குமாரபாளையத்தில் தெருவில் விளையாடிக் கொண்டிருந்த அந்தப் பிஞ்சு குழந்தை பாலியல் வன்கொடுமைக்கு ஆளாக்கப்பட்டு, தற்போது உயிருக்கு ஆபத்தான நிலையில் மருத்துவமனையில் தீவிர சிகிச்சைப் பிரிவில் அனுமதிக்கப்பட்டுள்ள செய்தி கேட்டு மனவேதனை அடைந்ததாகக் குறிப்பிட்டுள்ளார்.
தமிழக முதலமைச்சர் மு.க. ஸ்டாலின் தலைமையிலான திமுக அரசின் ஒட்டுமொத்த நிர்வாகச் சீர்கேட்டினால், இன்று சிறுமிகள் முதல் மூதாட்டிகள் வரை யாருக்கும் எங்கும் பாதுகாப்பு இல்லாத சூழல் நிலவுவதாக எடப்பாடியார் சாடியுள்ளார். “இப்படி ஒரு கேவலமான ஆட்சிக்கு பொறுப்பான நீங்கள், எந்த முகத்தை வைத்துக்கொண்டு மக்களிடம் மீண்டும் ஒருமுறை ஆட்சி செய்ய வாக்கு கேட்கிறீர்கள்?” என முதலமைச்சரைப் பார்த்து அவர் காட்டமான கேள்விகளை எழுப்பியுள்ளார். ஒரு ஏழு வயதுச் சிறுமிக்குத் தெருவில் கூடப் பாதுகாப்பு வழங்க முடியாத இந்த அரசு, “வெல்லும் தமிழ்ப் பெண்கள்” என வெற்று விளம்பரங்கள் செய்வதற்கு என்ன தார்மீக உரிமை உள்ளது என்றும் அவர் கேள்வி எழுப்பியுள்ளார்.
பாதிக்கப்பட்ட அந்தச் சிறுமிக்கு உயர்தரமான மற்றும் முறையான மருத்துவ சிகிச்சை அளிக்கப்பட வேண்டும் என்றும், இந்த அராஜகச் செயலில் ஈடுபட்ட கொடூரக் குற்றவாளி மீது எவ்விதப் பாரபட்சமுமின்றி கடும் சட்ட நடவடிக்கை எடுக்க வேண்டும் என்றும் எடப்பாடி பழனிசாமி வலியுறுத்தியுள்ளார். ‘ஸ்டாலின் மாடல்’ என்று கூறிக்கொள்ளும் இந்த ஆட்சியில் சட்டம்-ஒழுங்கு முழுமையாகச் சீர்குலைந்துவிட்டதாகக் குற்றம் சாட்டியுள்ள அவர், பெண்களின் பாதுகாப்பை உறுதி செய்யத் தவறிய திமுக அரசிற்கு மக்கள் உரியப் பாடம் புகட்டுவார்கள் எனத் தெரிவித்துள்ளார். 2026-ஆம் ஆண்டின் மகளிர் தினத்தில் இத்தகைய துயரச் சம்பவம் அரங்கேறியிருப்பது தமிழகம் முழுவதும் பெரும் கொந்தளிப்பை ஏற்படுத்தியுள்ளது.
