திருச்சி மாவட்டம் துறையூர் சட்டமன்றத் தொகுதிக்குட்பட்ட சொரத்தூர் ஊராட்சி எம்.ஜி.ஆர் நகர் மக்களின் இரண்டு தசாப்த கால நீண்ட போராட்டத்திற்குப் பிறகு, அப்பகுதியில் புதிய பகுதி நேர ரேஷன் கடை பயன்பாட்டிற்கு வந்துள்ளது. இன்று நடைபெற்ற விழாவில் துறையூர் சட்டமன்ற உறுப்பினர் எஸ். ஸ்டாலின் குமார் கலந்துகொண்டு, புதிய கடையைத் திறந்து வைத்து பொதுமக்களுக்கு அத்தியாவசியப் பொருட்களை விநியோகம் செய்தார். இதன் மூலம் அப்பகுதியைச் சேர்ந்த 110 குடும்ப அட்டைதாரர்களின் நீண்ட கால அலைச்சலுக்குத் தீர்வு காணப்பட்டுள்ளது.
சொரத்தூர் ஊராட்சியைச் சேர்ந்த எம்.ஜி.ஆர் நகர் பகுதியில் வசிக்கும் நூற்றுக்கும் மேற்பட்ட குடும்பங்கள், ரேஷன் பொருட்களை வாங்குவதற்காக கடந்த 20 ஆண்டுகளாக மிகுந்த சிரமத்தை எதிர்கொண்டு வந்தனர். இவர்கள் பொருட்கள் வாங்குவதற்காக வாகன நெரிசல் மிகுந்த பைபாஸ் சாலையை உயிரைப் பணயம் வைத்துக் கடந்து, நீண்ட தொலைவில் உள்ள கிழக்குவாடி பகுதிக்குச் செல்ல வேண்டிய கட்டாயம் இருந்தது. முதியவர்கள் மற்றும் பெண்கள் ரேஷன் பொருட்களைச் சுமந்து கொண்டு பல கிலோமீட்டர் நடப்பது பெரும் இன்னலாக இருந்து வந்தது. இக்கோரிக்கையைத் தேர்தலின் போது ஸ்டாலின் குமாரிடம் முன்வைத்த மக்கள், தங்கள் பகுதியில் பகுதி நேரக் கடையாவது அமைத்துத் தர வேண்டும் என வலியுறுத்தினர்.
மக்களின் நியாயமான கோரிக்கையை ஏற்று, கூட்டுறவுத் துறை அதிகாரிகளுடன் ஆலோசித்துத் தேவையான அனுமதியைப் பெற்றுத் தந்த சட்டமன்ற உறுப்பினர் ஸ்டாலின் குமார், இன்று அப்புதிய கடையை மக்கள் பயன்பாட்டிற்குக் கொண்டு வந்தார். விழாவில் அவர் பேசுகையில், “மக்களின் அத்தியாவசியத் தேவைகளை நிறைவேற்றுவதே இந்த அரசின் முதல் கடமை. இனி இப்பகுதி மக்கள் ஆபத்தான முறையில் சாலையைக் கடக்க வேண்டிய அவசியமில்லை” எனத் தெரிவித்தார். இந்நிகழ்ச்சியில் துறையூர் கிழக்கு ஒன்றிய செயலாளர் சிவ. சரவணன், எம்.ஜி.ஆர். நகர் கிளைச் செயலாளர் மொய்தீன், முக்கிய நிர்வாகிகள் செந்தில், மலர், பிரேமா, ஜாகிர் உசேன், போஜன் உள்ளிட்ட பலர் கலந்து கொண்டனர். பல ஆண்டு காலத் துயரத்தைப் போக்கியதற்காக அப்பகுதி மக்கள் எம்.எல்.ஏ ஸ்டாலின் குமார் மற்றும் கூட்டுறவுத் துறை அதிகாரிகளுக்கு நெகிழ்ச்சியுடன் தங்களது நன்றிகளைத் தெரிவித்துக் கொண்டனர்.
