தமிழகத்தில் 2026-ஆம் ஆண்டு நடைபெறவுள்ள பொதுத்தேர்தலை முன்னிட்டு, இந்திய தேர்தல் ஆணையத்தின் உத்தரவின்படி வாக்காளர் பட்டியல் சிறப்புத் திருத்தப் பணிகள் நாடு முழுவதும் முழுவீச்சில் நடைபெற்று வருகின்றன. இதன் ஒரு பகுதியாக, நாமக்கல் மாவட்ட கலெக்டர் அலுவலகத்தில் ‘வாக்காளர் பட்டியல் சிறப்பு தீவிர திருத்தம்-2026’ பணிகள் குறித்த ஆலோசனைக் கூட்டம் நேற்று நடைபெற்றது. இந்திய தேர்தல் ஆணையத்தால் நாமக்கல் மாவட்டத்திற்காக நியமிக்கப்பட்டுள்ள வாக்காளர் பட்டியல் சிறப்புப் பார்வையாளர் குல்திப் நாராயண் தலைமையில் நடைபெற்ற இந்தத் திருத்தப் பணிகளை, மாவட்டத் தேர்தல் அலுவலரும் கலெக்டருமான துர்கா மூர்த்தி முன்னின்று ஒருங்கிணைத்தார்.
இக்கூட்டத்தில், வாக்காளர் பட்டியலை 100 சதவீதம் பிழையற்றதாக மாற்றுவது குறித்து விரிவாக விவாதிக்கப்பட்டது. குறிப்பாக, ஒரு வாக்குச்சாவடியில் 1,200-க்கும் மேற்பட்ட வாக்காளர்கள் இருந்தால், வாக்காளர்களின் வசதிக்காக அந்த வாக்குச்சாவடிகளைப் பிரிப்பது, புதிய வாக்குச்சாவடிகளை உருவாக்குவது மற்றும் வாக்குச்சாவடி அமைவிடங்களை மாற்றியமைப்பது போன்ற முக்கிய அம்சங்கள் ஆய்வுக்கு எடுத்துக்கொள்ளப்பட்டன. கூட்டத்தில் பேசிய சிறப்புப் பார்வையாளர் குல்திப் நாராயண், “அனைத்து அரசியல் கட்சிகளும் தங்களது வாக்குச்சாவடி நிலை முகவர்களை (BLA-2) உடனடியாக நியமிக்க வேண்டும். முகவரியில் இல்லாதவர்கள், குடிபெயர்ந்தவர்கள், இறந்தவர்கள் மற்றும் இரட்டைப் பதிவு கொண்ட வாக்காளர்களைக் கண்டறிந்து பட்டியலைத் தூய்மைப்படுத்துவதில் முகவர்களின் ஒத்துழைப்பு மிக அவசியம்” என்று வலியுறுத்தினார்.
மேலும், 18 வயது பூர்த்தியடைந்த புதிய வாக்காளர்களைப் பட்டியலில் சேர்க்க படிவம்-6 பெறுவதை உறுதி செய்யுமாறு அதிகாரிகளுக்கு அவர் உத்தரவிட்டார். ஆலோசனைக் கூட்டத்திற்குப் பிறகு, நாமக்கல் சட்டசபை தொகுதிக்குட்பட்ட மாநகராட்சிப் பகுதிகளான கொண்டிசெட்டிபட்டி, பெரியூர் மற்றும் கிருஷ்ணாபுரம் ஆகிய இடங்களில் சிறப்புப் பார்வையாளர் குல்திப் நாராயண் நேரில் சென்று கள ஆய்வு மேற்கொண்டார். அங்கு வீடுகளுக்கேச் சென்று வாக்காளர் விவரங்களைச் சரிபார்க்கும் பணிகளை ஆய்வு செய்த அவர், பொதுமக்களிடம் வாக்காளர் பட்டியலில் பெயர் விடுபட்டுள்ளதா என்பது குறித்துக் கேட்டறிந்தார். இந்த ஆய்வின் போது மாவட்ட வருவாய் அலுவலர் சரவணன், கலெக்டரின் நேர்முக உதவியாளர் சந்தியா மற்றும் தேர்தல் பிரிவு அரசு அலுவலர்கள் உடனிருந்தனர். இந்தத் தீவிர நடவடிக்கையின் மூலம், நாமக்கல் மாவட்டத்தில் குளறுபடிகளற்ற இறுதி வாக்காளர் பட்டியலை வெளியிடத் தேர்தல் பிரிவு இலக்கு நிர்ணயித்துள்ளது.
