இந்திய வாகனச் சந்தையில் கால் பதித்து வெற்றிகரமாக 25 ஆண்டுகளை நிறைவு செய்துள்ள ஸ்கோடா ஆட்டோ இந்தியா நிறுவனம், கடந்த 2025-ஆம் ஆண்டைத் தனது பயணத்தின் பொற்காலமாகக் குறித்துள்ளது. முந்தைய ஆண்டுகளை விட இரு மடங்கு விற்பனை வளர்ச்சியைப் பதிவு செய்துள்ள இந்நிறுவனம், இந்திய வாடிக்கையாளர்களின் நம்பிக்கையைப் பெற்ற முன்னணி ஐரோப்பிய பிராண்டாகத் தன்னை நிலைநிறுத்திக் கொண்டுள்ளது. 2024-ஆம் ஆண்டில் 35,166 கார்களை விற்பனை செய்திருந்த ஸ்கோடா, 2025-ஆம் ஆண்டில் 72,665 யூனிட்கள் என்ற இலக்கை எட்டி, சுமார் 107 சதவீத வருடாந்திர வளர்ச்சியைப் பதிவு செய்து ஆட்டோமொபைல் துறையையே வியப்பில் ஆழ்த்தியுள்ளது.
இந்த அசுர வளர்ச்சி குறித்து ஸ்கோடா ஆட்டோ இந்தியா பிராண்ட் இயக்குநர் ஆஷிஷ் குப்தா மகிழ்ச்சியுடன் பகிர்ந்து கொள்கையில், “2025-ஆம் ஆண்டு ஸ்கோடா குடும்பத்திற்கு ஒரு வரலாற்றுச் சிறப்புமிக்க ஆண்டாகும். எங்களது 25 ஆண்டுகால இந்தியப் பயணத்தைக் கொண்டாடும் அதே வேளையில், வாடிக்கையாளர்களின் தேவைகளை உணர்ந்து மேம்படுத்தப்பட்ட தயாரிப்புகளை வழங்கியதே இந்த வெற்றிக்குக் காரணம்” எனத் தெரிவித்தார். குறிப்பாக, சந்தையில் அறிமுகமான ‘கைலாக்’ மாடலுக்குக் கிடைத்த அமோக வரவேற்பும், பிரீமியம் எஸ்யூவி பிரிவில் ‘கோடியாக்’ மீதான ஈர்ப்பும், ஆக்டேவியா ஆர்எஸ் (Octavia RS) மாடலின் மீள் வருகையும் ஸ்கோடா பிராண்டிற்கும் இந்திய வாடிக்கையாளர்களுக்கும் இடையிலான பிணைப்பை மேலும் வலுப்படுத்தியுள்ளது.
இந்த வெற்றியானது வெறும் தயாரிப்புகளுடன் மட்டும் நின்றுவிடாமல், நிறுவனத்தின் சேவை விரிவாக்கத்திலும் பிரதிபலிக்கிறது. ‘இந்தியா 2.0’ திட்டத்தின் கீழ் அறிமுகம் செய்யப்பட்ட குஷாக் மற்றும் ஸ்லாவியா மாடல்கள் சந்தையில் நிலையான இடத்தைப் பிடித்துள்ள நிலையில், தனது விற்பனை மற்றும் சேவை மையங்களை (Touchpoints) நாடு முழுவதும் 183 நகரங்களில் 325-க்கும் மேலாக ஸ்கோடா விரிவுபடுத்தியுள்ளது. தற்போது 2026-ஆம் ஆண்டில் அடியெடுத்து வைத்துள்ள நிலையில், எலக்ட்ரிக் வாகனத் தயாரிப்புகள், டிஜிட்டல் முறையிலான விற்பனைச் சேவைகள் மற்றும் குறைந்த பராமரிப்புச் செலவில் உயர்ரகக் கார்களை வழங்குதல் போன்ற இலக்குகளுடன் தனது வளர்ச்சிப் பாதையைத் தொடரத் திட்டமிட்டுள்ளது. தரம் மற்றும் பாதுகாப்பிற்கு முன்னுரிமை அளிக்கும் ஸ்கோடாவின் இந்த உத்தி, வரும் காலங்களிலும் அதன் விற்பனை வேகத்தைத் தக்கவைக்கும் என எதிர்பார்க்கப்படுகிறது.
