தூத்துக்குடி மாவட்டம் கோவில்பட்டி மாவட்ட தலைமை அரசு மருத்துவமனையில், மருத்துவர்களுக்குப் பதிலாகத் தூய்மைப் பணி மேற்பார்வையாளர் ஒருவர் நோயாளிக்குச் சிகிச்சை அளித்த சம்பவம் சமூக வலைதளங்களில் வீடியோவாக வெளியாகி பெரும் அதிர்ச்சியை ஏற்படுத்தியுள்ளது. அரசு மருத்துவமனைகளின் பாதுகாப்பு மற்றும் மருத்துவ நெறிமுறைகள் குறித்த கேள்விகளை இந்தச் சம்பவம் எழுப்பியுள்ளது.
கோவில்பட்டி அரசு மருத்துவமனையில் தூய்மைப் பணிகளை மேற்கொள்ளும் தனியார் ஒப்பந்த நிறுவனத்தின் கீழ், மேற்பார்வையாளராகச் சுப்புராஜ் என்பவர் பணியாற்றி வருகிறார். இந்நிலையில், மருத்துவமனையின் அவசர சிகிச்சை பிரிவில் (Casualty Ward) அனுமதிக்கப்பட்ட நோயாளி ஒருவருக்கு, மருத்துவ உபகரணங்களைக் கொண்டு சுப்புராஜ் சிகிச்சை அளிப்பது போன்ற காட்சிகள் அடங்கிய வீடியோ தற்போது இணையத்தில் வேகமாகப் பரவி வருகிறது. பொதுவாக, அவசர சிகிச்சை பிரிவு என்பது மிக முக்கியமான பகுதியாகும்; அங்கு பயிற்சி பெற்ற மருத்துவர்கள், செவிலியர்கள் மற்றும் மருத்துவப் பணியாளர்களுக்கு மட்டுமே அனுமதி வழங்கப்பட்டு, அவர்கள் மட்டுமே சிகிச்சைகளை மேற்கொள்ள வேண்டும் என்பது விதியாகும்.
ஆனால், அந்தப் பிரிவில் மருத்துவர்கள் யாரும் இல்லாத நேரத்தைப் பயன்படுத்திக் கொண்டு, மருத்துவப் படிப்பு எதனையும் பயிலாத ஒரு தூய்மைப் பணி மேற்பார்வையாளர் சிகிச்சையில் ஈடுபட்டது நோயாளிகளின் பாதுகாப்பைக் கேள்விக்குறியாக்கியுள்ளது. இந்த அத்துமீறல் குறித்து சமூக ஆர்வலர்கள் கடும் கண்டனம் தெரிவித்துள்ளனர். முறையான மருத்துவ அறிவு இல்லாதவர்கள் சிகிச்சை அளிப்பது உயிருக்கே ஆபத்தாக முடியும் என்பதால், சம்பந்தப்பட்ட சுப்புராஜ் மற்றும் அந்த நேரத்தில் பணியில் இல்லாத மருத்துவர்கள் மீது மருத்துவமனை நிர்வாகம் கடுமையான விசாரணை நடத்தி உரிய நடவடிக்கை எடுக்க வேண்டும் என்று கோரிக்கைகள் வலுத்துள்ளன.
அரசு மருத்துவமனைகளில் இத்தகைய அஜாக்கிரதையான செயல்பாடுகள் தொடராமல் இருப்பதை உறுதி செய்ய மாவட்ட சுகாதாரத் துறை மற்றும் மருத்துவமனை கண்காணிப்பாளர் உரிய விளக்கம் அளிக்க வேண்டும் என்பதே பொதுமக்களின் எதிர்பார்ப்பாக உள்ளது.
