மதுரை மாநகரின் அடையாளங்களில் ஒன்றாகத் திகழும் அல்-அமீன் மேல்நிலைப்பள்ளி வளாகம், இன்று ஜாதி, மதங்களைக் கடந்த மாபெரும் மனிதநேய சங்கமமாக மாறியது. இந்திய மாணவர் சங்கத்தின் புதூர் கமிட்டி, தமிழ்நாடு சிறுபான்மை மக்கள் நலக்குழு மற்றும் அல்-அமீன் மேல்நிலைப்பள்ளி நிர்வாகம் ஆகியவை இணைந்து நடத்திய இந்த ‘சமத்துவ பொங்கல்’ விழா, தமிழர்களின் பாரம்பரியப் பண்பாட்டையும், சமூக நல்லிணக்கத்தையும் பறைசாற்றும் விதமாக மிகச் சிறப்பாக நடைபெற்றது. தமிழ்நாடு சிறுபான்மை மக்கள் நலக்குழுவின் மாநிலத் துணைத் தலைவர் அலாவுதீன் தலைமையில் நடைபெற்ற இந்த விழாவில், மதங்களைக் கடந்து அனைவரும் வேட்டி, சேலை எனத் தமிழர் மரபு உடையில் பங்கேற்றது விழாவிற்கு மெருகூட்டியது. வக்பு வாரிய கல்லூரி ஆட்சிமன்ற குழு உறுப்பினர் முகமது அப்துல்லா, இந்திய மாணவர் சங்க புதூர் கமிட்டி தலைவர் ரெய்ஹன் சுமன் மற்றும் சிறுபான்மை நலக்குழு செயலாளர் முஜிபுர் ரஹ்மான் ஆகியோர் முன்னிலை வகிக்க, பள்ளியின் தலைமையாசிரியர் ஷேக்நபி அனைவரையும் இன்முகத்துடன் வரவேற்று விழாவைத் தொடங்கி வைத்தார்.
இந்த விழாவில் சிறப்பு அழைப்பாளராக மதுரை மாநகராட்சி மேயர் (பொறுப்பு) நாகராஜன் கலந்து கொண்டு, புதுப்பானையில் பொங்கலிட்டு விழாவைத் தொடங்கி வைத்தார். அவருடன் மாமன்ற உறுப்பினர்கள் முத்துமாரி ஆழ்வார், ராதா மணிமாறன் மற்றும் பல்வேறு அமைப்புகளின் நிர்வாகிகள் இணைந்து ‘பொங்கலோ பொங்கல்’ என முழக்கமிட்டபோது, பள்ளி வளாகம் முழுவதும் மகிழ்ச்சி அலை வீசியது. விழாவில் பேசிய சிறப்பு விருந்தினர்கள், பொங்கல் திருவிழா என்பது வெறும் அறுவடைத் திருவிழா மட்டுமல்ல, அது மண்ணின் மைந்தர்களுக்கிடையிலான ஒற்றுமையை வலுப்படுத்தும் திருவிழா என்பதையும், குறிப்பாக இது போன்ற சிறுபான்மை கல்வி நிறுவனங்களில் நடைபெறும் சமத்துவ பொங்கல் விழாக்கள் வருங்காலத் தலைமுறையினரிடையே மதச்சார்பின்மை மற்றும் சகோதரத்துவத்தைப் விதைக்கும் மிக முக்கியப் பணி என்பதையும் ஆழமாகப் பதிவு செய்தனர்.
விழாவின் ஒரு பகுதியாக, பாரம்பரிய கலை நிகழ்ச்சிகளும் மாணவர்களின் கலைத் திறமைகளும் அரங்கேற்றப்பட்டன. தமிழ்நாடு சிறுபான்மை மக்கள் நலக்குழு நிர்வாகிகள் கணேசமூர்த்தி, ஜான்சன், கல்யாணசுந்தரம், லாவண்யா குணசேகரன் மற்றும் சூர்யாநகர் கிளைத் தலைவர் சண்முகவேல் ஆகியோர் மாணவர்களை உற்சாகப்படுத்தினர். அதேபோல், இந்திய மாணவர் சங்கத்தின் சார்பில் டீலன் ஜெஸ்டின், டேவிட் ராஜதுரை, தீபலட்சுமி, சம்சீர் அகமது, பால்பிரிட்டோ மற்றும் மத்திய குழு உறுப்பினர் சசிகலா, சப்ராபீபி உள்ளிட்ட ஏராளமான நிர்வாகிகள் பங்கேற்று, சமூக நீதியையும் சமத்துவத்தையும் காக்க வேண்டியதன் அவசியத்தை வலியுறுத்தினர். விழாவின் இறுதியில், கரும்பு மற்றும் இனிப்புகள் வழங்கப்பட்டு அனைவரும் மகிழ்ச்சியைப் பகிர்ந்து கொண்டனர்.
இந்திய மாணவர் சங்க புதூர் கமிட்டி செயலாளர் கண்ணன் அனைவருக்கும் நன்றி தெரிவிக்க, அல்-அமீன் பள்ளியின் ஆசிரியர்கள், மாணவர்கள் மற்றும் அப்பகுதி பொதுமக்கள் என ஆயிரக்கணக்கானோர் இந்த சமத்துவக் கொண்டாட்டத்தில் இணைந்து ஒருவருக்கொருவர் வாழ்த்துகளைப் பரிமாறிக் கொண்டனர். ஜாதி, மத அடையாளங்களுக்கு அப்பாற்பட்டு தமிழர்கள் என்ற ஒற்றை உணர்வுடன் நடைபெற்ற இந்த நிகழ்வு, மதுரை மண்ணின் மத நல்லிணக்கத்திற்குச் சான்றாக அமைந்தது.