மத்திய இளைஞர் நலம் மற்றும் விளையாட்டு அமைச்சகத்தின் வழிகாட்டுதலின்படி, புதுச்சேரி மாநில நாட்டு நலப்பணித் திட்டம் (NSS) சார்பில் இமாச்சலப் பிரதேசம் குலு மணாலிக்குச் சென்று கடினமான சாகசப் பயிற்சிகளை வெற்றிகரமாக முடித்துத் திரும்பிய மாணவ-மாணவிகளுக்குப் புதுச்சேரி அரசு சார்பில் பாராட்டு விழா நடைபெற்றது. இமாச்சலப் பிரதேசத்தில் உள்ள புகழ்பெற்ற ‘வாஜ்பாய் மவுண்டனியரிங் மற்றும் அல்லியட் ஸ்போர்ட்ஸ்’ (Vajpayee Institute of Mountaineering and Allied Sports) என்ற உயரிய சாகச விளையாட்டுப் பயிற்சி நிறுவனம் மூலம் ஆண்டுதோறும் இந்தச் சிறப்பு முகாம் நடத்தப்படுகிறது. இதில் மலையேற்றம் (Mountaineering), பனிச்சறுக்கு (Skiing), ஆற்று நீர் நீச்சல் மற்றும் மலைப் பகுதிகளில் விபத்து காலங்களில் மேற்கொள்ள வேண்டிய மீட்பு நடவடிக்கைகள் (Mountain Rescue) குறித்த அதிநவீனப் பயிற்சிகள் வழங்கப்படுகின்றன. இந்த ஆண்டு புதுச்சேரி மண்டல இயக்குநர் சாமுவேல் செல்லையாவின் வழிகாட்டுதலின் பேரில், பல்வேறு கல்லூரிகளைச் சேர்ந்த 20 பேர் கொண்ட என்.எஸ்.எஸ் மாணவர் குழுவினர் கடந்த நவம்பர் 19-ஆம் தேதி புதுச்சேரியிலிருந்து இப்பயிற்சிக்காக வழியனுப்பி வைக்கப்பட்டனர்.
கலிதீர்த்தாள்குப்பம் காமராசர் கலைக் கல்லூரி திட்ட அலுவலர் செந்தமிழ்ராஜா மற்றும் ஈஸ்டு கோஸ்ட் மருத்துவ அறிவியல் நிறுவனத்தின் திட்ட அலுவலர் லாவண்யா ஆகியோர் இந்தக் குழுவை வழிநடத்திச் சென்றனர். இமாச்சலப் பிரதேசத்தின் கடுங்குளிர் மற்றும் கரடுமுரடான மலைப் பிரதேசச் சூழலில் வழங்கப்பட்ட சவாலான பயிற்சிகளைச் சிறப்பாக முடித்துத் திரும்பிய மாணவர்களையும், அவர்களுக்குத் துணையாகச் சென்ற ஆசிரியர்களையும் பாராட்டும் விதமாகப் புதுச்சேரியில் நடைபெற்ற விழாவில், விளையாட்டு மற்றும் இளைஞர் நலத்துறை கூடுதல் கலெக்டர் சுதாகர் கலந்து கொண்டு சான்றிதழ்களை வழங்கினார். அப்போது பேசிய அவர், “இத்தகைய சாகசப் பயிற்சிகள் மாணவர்களின் தன்னம்பிக்கையை அதிகரிப்பதுடன், பேரிடர் காலங்களில் சமூகத்திற்குப் பங்களிக்க அவர்களைத் தயார்படுத்துகின்றன” எனப் பாராட்டினார். இந்நிகழ்வின் போது புதுச்சேரி மாநில என்.எஸ்.எஸ் திட்ட தொடர்பு அதிகாரி சதிஷ்குமார், திட்ட ஒருங்கிணைப்பாளர் சரவணன் உள்ளிட்ட உயர் அதிகாரிகள் மற்றும் பேராசிரியர்கள் உடனிருந்து மாணவர்களின் சாதனையைப் போற்றினர்.