காத்மண்டு :
நேபாளத்தில் 26 சமூக வலைதளங்களுக்கு தடை விதிக்கப்பட்டதை எதிர்த்து இளைஞர்கள் கடும் போராட்டத்தில் ஈடுபட்டனர். இதனை கட்டுப்படுத்தும் முயற்சியில் போலீஸ் துப்பாக்கிச் சூடு நடத்தியதில் குறைந்தது 9 பேர் பலியாகியுள்ளனர்.
நேபாள அரசின் உத்தரவு படி, இன்ஸ்டாகிராம், ஃபேஸ்புக், எக்ஸ் (ட்விட்டர்), யூடியூப் உள்ளிட்ட 26 சமூக வலைதளங்கள் செப்டம்பர் 4 ஆம் தேதி முதல் முடக்கப்பட்டன. காரணமாக, அந்நாட்டில் இயங்கும் சமூக வலைதள நிறுவனங்கள் தொலைத்தொடர்பு மற்றும் தகவல் தொழில்நுட்பத் துறையில் பதிவு செய்ய வேண்டும் என்ற அரசின் உத்தரவை அவை பின்பற்றாதது குறிப்பிடப்படுகிறது.
இந்தத் தடை உத்தரவை எதிர்த்து நேபாளம் முழுவதும் மக்கள், குறிப்பாக இளைஞர்கள் கடும் எதிர்ப்பு தெரிவித்தனர். இன்று காத்மண்டுவில் போராட்டம் தீவிரமடைந்து பெரும் கூட்டமாக மாறியது. போராட்டக்காரர்கள், “நேபாள அரசில் ஊழல் அதிகம் உள்ளது” என சத்தமிட்டு அரசுக்கு எதிராக கோஷம் எழுப்பினர்.
அதிகரித்த போராட்டத்தை கட்டுப்படுத்த போலீஸார் அங்கு குவிக்கப்பட்டனர். பின்னர் போராட்டக்காரர்களுக்கும் போலீஸாருக்கும் இடையே மோதல் வெடித்தது. நிலைமை கட்டுக்குள் வராததால் போலீஸார் துப்பாக்கிச் சூடு நடத்தினர்.
இதில் 9 பேர் உயிரிழந்ததுடன், நூற்றுக்கணக்கானோர் காயமடைந்துள்ளதாக தகவல் வெளியாகியுள்ளது. நேபாளம் முழுவதும் நிலைமை பரபரப்பாக மாறியுள்ளது.
