அமர்நாத் யாத்திரீகர்கள் மீது தாக்குதல் திட்டம் : மீண்டும் ஒரு பஹல்காம் ?

ஜம்மு : அமர்நாத் யாத்திரை தொடங்க உள்ளதை முன்னிட்டு, பயங்கரவாதிகள் தாக்குதல் நடத்த திட்டமிட்டுள்ளதாக ரகசிய உளவுத்தகவல் கிடைத்ததை அடுத்து பாதுகாப்பு ஏற்பாடுகள் செய்யப்பட்டுள்ளன.

கடந்த ஏப்ரல் 22ம் தேதி ஜம்மு காஷ்மீர் மாநிலத்தின் பஹல்காம் பகுதியில் நடந்த பயங்கரவாத தாக்குதலில் 24 பேர் உயிரிழந்தனர். இத்தாக்குதலில் பாகிஸ்தான் ஆதரவு பயங்கரவாதிகள் தொடர்புடையவர்கள் இருந்தது பின்னர் கண்டறியப்பட்டது. இதனைத் தொடர்ந்து, இந்தியா பதிலடி நடவடிக்கையாக பாகிஸ்தான் ஆக்கிரமிப்பு பகுதியில் உள்ள பயங்கரவாத தளங்களை குறிவைத்து தாக்கியது. இரு நாடுகளும் முற்றுப்போராக மோதும் நிலை உருவான நிலையில், தற்காலிகமாக போர் நடவடிக்கைகள் நிறுத்தப்பட்டன.

இந்தச் சூழலில், பனிலிங்க தரிசனத்திற்காக ஆண்டுதோறும் நடைபெறும் அமர்நாத் யாத்திரை சில நாட்களில் துவங்கவுள்ளது. தினசரி 30,000க்கும் மேற்பட்ட யாத்ரீகர்கள் பல்டால் மற்றும் பஹல்காம் வழியாக புனித குகையை அடைகின்றனர். இந்த யாத்திரையின் போது லஷ்கர் அல்லது இதன் ஆதரவு படையினர் தாக்குதல் நடத்த திட்டம் தீட்டியிருப்பதாக உளவுத்துறைக்கு தகவல் கிடைத்துள்ளது.

தாக்குதல் திட்டமிடப்பட்டுள்ள பிர் பஞ்சால் காட்டுப் பகுதிகளில் பயங்கரவாதிகள் பதுங்கியிருக்கும் வாய்ப்பு உள்ளதால், அந்த வழியாக தீவிர ரோந்துப் பணிகள் முன்னெடுக்கப்படும் என உள்துறை அமைச்சகம் தெரிவித்துள்ளது. இந்த தகவலின் அடிப்படையில் சிஆர்பிஎப் மற்றும் பிற பாதுகாப்புப் படைகள் ஆலோசனை நடத்தி, பாதுகாப்பு நடவடிக்கைகள் தீவிரப்படுத்தப்பட்டுள்ளன.

இதற்கிடையில், ஏப்ரல் மாதத்தில் பஹல்காமில் தாக்குதலை நடத்திய பயங்கரவாதிகள் இன்னும் சுதந்திரமாக உலா வருவதாகவும், அவர்கள் முற்றிலும் ஒழிக்கப்படவில்லை என்பது உள்ளூர் மக்கள் மத்தியில் பதற்றத்தை ஏற்படுத்தியுள்ளது.