சிவகங்கை மாவட்டம் மானாமதுரையில், பயணிகளை ஏற்றுவதில் நிலவும் நேரப் போட்டி காரணமாக அரசு மற்றும் தனியார் பேருந்து ஊழியர்களிடையே ஏற்பட்ட மோதலால், நடுவழியில் பேருந்துகள் நிறுத்தப்பட்டு பயணிகள் கடும் அவதிக்குள்ளாகினர். மானாமதுரை புதிய பேருந்து நிலையத்திலிருந்து நேற்று காலை திருப்புத்தூருக்குத் தனியார் பேருந்து ஒன்று புறப்பட்டுச் சென்றது. அதே நேரத்தில், கமுதியிலிருந்து காரைக்குடி நோக்கி அரசுப் பேருந்து ஒன்றும் வந்து கொண்டிருந்தது. பேருந்து நிலையத்திலிருந்து வெளியேறியது முதலே, பயணிகளை முந்திக் கொண்டு ஏற்றுவதற்காக இரு பேருந்துகளுக்கும் இடையே கடும் நேரப் போட்டி நிலவியது.
இந்த நேரப் பிரச்னை முற்றிய நிலையில், தனியார் பேருந்து ஊழியர்கள் திடீரெனத் தங்களது வாகனத்தை அரசுப் பேருந்துக்குக் குறுக்காக நிறுத்தி வழிமறித்தனர். இதனால் இரு பேருந்துகளின் ஓட்டுநர்கள் மற்றும் நடத்துநர்களுக்கு இடையே நடுரோட்டில் கடும் வாக்குவாதம் ஏற்பட்டது. காலை நேரம் என்பதால், பேருந்துகளில் இருந்த அரசு ஊழியர்கள், பள்ளி மற்றும் கல்லூரிகளுக்குச் செல்லும் மாணவர்கள், அவசர வேலை நிமித்தமாகச் செல்பவர்கள் என அனைவரும் இறங்கவும் முடியாமல், மேற்கொண்டு செல்லவும் முடியாமல் சுமார் அரை மணி நேரத்திற்கும் மேலாக நடுவழியில் தவித்தனர். ஓட்டுநர்களின் இந்த பொறுப்பற்ற செயலால் பொதுமக்களின் இயல்பு வாழ்க்கை பாதிக்கப்பட்டது.
இதே போன்ற நேரப் பிரச்னை மற்றும் அதனால் ஏற்படும் தகராறுகள் மானாமதுரை மட்டுமல்லாது சிவகங்கை, காரைக்குடி, மதுரை உள்ளிட்ட மாவட்டத்தின் பல்வேறு பகுதிகளிலும் தொடர்கதையாகி வருகிறது. பேருந்துகள் நிர்ணயிக்கப்பட்ட நேர இடைவெளியில் இயக்கப்படுகிறதா என்பதைக் கண்காணிக்க வேண்டிய அதிகாரிகள் மெத்தனமாக இருப்பதே இதுபோன்ற மோதல்களுக்குக் காரணம் எனச் சமூக ஆர்வலர்கள் குற்றம் சாட்டுகின்றனர். ஓட்டுநர்களின் இந்தப் போட்டி மனப்பான்மையால் பல நேரங்களில் அதிவேகமாகப் பேருந்துகள் இயக்கப்பட்டு விபத்துகள் நிகழும் அபாயமும் உள்ளது.
எனவே, மாவட்டப் போக்குவரத்து அலுவலர் மற்றும் காவல்துறை அதிகாரிகள் உடனடியாகத் தலையிட்டு, அரசு மற்றும் தனியார் பேருந்துகளுக்கு இடையிலான நேரப் பங்கீட்டை (Time Table) முறைப்படுத்த வேண்டும். பொதுமக்களுக்கு இடையூறு விளைவிக்கும் வகையில் நடுவழியில் பேருந்துகளை நிறுத்தி வாக்குவாதத்தில் ஈடுபடும் ஊழியர்கள் மீது கடுமையான ஒழுங்கு நடவடிக்கை எடுக்க வேண்டும் என்றும், உரிய நேரத்தில் பேருந்துகள் இயக்கப்படுவதை உறுதி செய்ய வேண்டும் என்றும் சிவகங்கை மாவட்டப் பொதுமக்கள் கோரிக்கை விடுத்துள்ளனர்.
