கிரிக்கெட்டில் இந்தியாவை உலக அளவில் பெருமைப்படுத்திய முன்னாள் கேப்டனும், மூன்று ஐசிசி கோப்பைகளை வென்ற ஒரே இந்திய வீரருமான எம்.எஸ். தோனி, தற்போது ட்ரோன் பைலட் உரிமம் பெற்றுள்ளார்.
கிரிக்கெட்டைத் தாண்டியும் பைக்குகள், கார்கள், விவசாயம், ராணுவம் போன்ற துறைகளில் ஆர்வம் கொண்டிருக்கும் தோனி, தனது பல்துறை திறமையை மேலும் ஒரு முறை நிரூபித்துள்ளார்.
2011 ஆம் ஆண்டில் இந்திய ராணுவத்தின் பாராசூட் ரெஜிமென்டில் லெப்டினன்ட் கர்னல் கௌரவப் பதவி பெற்ற தோனி, 2019 இல் ஜம்மு-காஷ்மீரில் 15 நாட்கள் பாதுகாப்புப் பணிகளில் கலந்து கொண்டு, பின் சி-130ஜே சூப்பர் ஹெர்குலஸ் விமானத்தில் இருந்து பாராசூட் தாவல்களை நிறைவு செய்தார். இதனால் அவர் ஒரு சான்றளிக்கப்பட்ட பாராசூட்டராக மாறினார்.
அந்த அனுபவத்தைத் தொடர்ந்து, தோனி தற்போது இந்தியாவின் முன்னணி ட்ரோன் உற்பத்தியாளர்களில் ஒன்றான கருடா ஏரோஸ்பேஸ் நிறுவனத்திலிருந்து முறையான ட்ரோன் பைலட் பயிற்சியை முடித்து, உரிமம் பெற்றுள்ளார்.
இந்நிலையில், அக்டோபர் 8 ஆம் தேதி தனது சமூக ஊடகப் பக்கத்தில் இதைத் தோனி அதிகாரப்பூர்வமாக அறிவித்தார்.
கருடா ஏரோஸ்பேஸின் தலைமை நிர்வாக அதிகாரி அக்னேஷ்வர் ஜெயபிரகாஷ், “தோனி மிக வேகமாக கற்றுக்கொண்டு உரிமம் பெற்றார்; அவருடன் பணிபுரிந்தது எங்களுக்கே ஒரு பெருமை,” என தெரிவித்தார்.
இந்த முயற்சியுடன், தோனி இந்தியாவில் ட்ரோன் தொழில்நுட்ப வளர்ச்சிக்கும் இளைஞர்களுக்கான புதிய வாய்ப்புகளுக்கும் ஒரு ஊக்கமாக திகழ்கிறார்.
