மேகாலயா : இன்டோர் நகரத்தைச் சேர்ந்த தொழிலதிபர் ராஜா ரகுவன்ஷி (வயது 32) மற்றும் அவரது மனைவி சோனம், கடந்த மே 11ஆம் தேதி திருமணமான பின்னர், தேனிலவுக்காக மேகாலயா மாநிலத்துக்குச் சென்றனர். இந்த ஜோடி மாயமான நிலையில், ஜூன் 2ஆம் தேதி ராஜா ரகுவன்ஷியின் சடலம் ஒரு மலைப் பள்ளத்தாக்கில் கண்டெடுக்கப்பட்டு, அதனைத் தொடர்ந்து அவரது மனைவி சோனம் காவல்துறையிடம் சரணடைந்தார்.
இதன்பின் போலீசார் தீவிர விசாரணை மேற்கொண்டனர். தற்போது, இந்த கொலை வழக்கில் புதிய தகவல் வெளியாகியுள்ளது. சோனத்திற்கு திருமணத்திற்கு முன்பும் பிறகும், சஞ்சய் வர்மா என்ற நபருடன் நெருக்கமான தொடர்பு இருந்தது என காவல்துறையினரின் விசாரணையில் தெரியவந்துள்ளது. மார்ச் 1 முதல் 25 வரை மட்டும் இருவரும் மொத்தம் 119 முறை தொலைபேசி அழைப்புகளை பரிமாறிக்கொண்டதாக போலீசார் தெரிவித்துள்ளனர்.
சஞ்சய் தற்போது மறைவில் உள்ள நிலையில், அவரது மொபைல் எண் அணைத்து வைக்கப்பட்டுள்ளது. அவரை தேடி போலீசார் தீவிர நடவடிக்கைகளை மேற்கொண்டு வருகின்றனர்.
இதேவேளை, தம்பதியினரிடம் நான்கு மொபைல் போன்கள் இருந்த நிலையில், ராஜாவை கொன்ற பின் அவரது மொபைலை முற்றிலும் அழித்து எரித்ததாக தெரிகிறது. சோனத்தின் மற்ற மூன்று போன்கள் தற்போது மாயமாக உள்ளன. அவற்றை கண்டுபிடிக்கும் பணி தொடர்ந்து நடைபெற்று வருகிறது.
கைது செய்யப்பட்ட சோனத்திடம், தனது சிம் கார்டை எந்த போனில் பயன்படுத்தினார், வாட்ஸ்அப் செயலியில் என்ன செய்தியாற்றல் இருந்தது என்பதுபோல பல முக்கியமான கோணங்களில் போலீசார் தீவிரமாக விசாரித்து வருகின்றனர். மேலும் கைது செய்யப்பட்ட மற்ற மூன்று நபர்களிடம் இருந்து கூடுதல் தகவல்களும் பெறப்பட்டுள்ளதாக தெரிகிறது.
