பாகிஸ்தான் ஆக்கிரமிப்பு காஷ்மீர் பகுதியில் ஜெய்ஷ் இ முகமது அமைப்பின் தலைவர் மற்றும் சர்வதேச பயங்கரவாதி மசூத் அசார் நடமாடி வருவதை இந்திய உளவுத்துறை கண்டறிந்துள்ளதாக தகவல்கள் வெளியாகியுள்ளன.
அமெரிக்கா மற்றும் ஐ.நா. அமைப்பால் பயங்கரவாதியாக அறிவிக்கப்பட்ட மசூத் அசார், பதான்கோட் (2016) மற்றும் புல்வாமா (2019) தாக்குதல்களுக்கு மூளையாக செயல்பட்டவன். இந்திய விமானப்படை மற்றும் பாஸ்போர்ட் துறை மீது மேற்கொண்ட தாக்குதல்களுக்குப் பிறகு, இந்தியாவால் நடத்தப்பட்ட ‘ஆபரேஷன் சிந்தூர்’ நடவடிக்கையில், பாக் ஆக்கிரமிப்பு பகுதிகளில் உள்ள ஜெய்ஷ் பயங்கரவாத முகாம்கள் அழிக்கப்பட்டன. அந்த நடவடிக்கையின் போது அசாரின் குடும்பத்தினர் பலியானார்கள் என கூறப்படுகிறது. ஆனால் மசூத் அசார் அந்த தாக்குதலிலிருந்து தப்பியதாக தெரிவிக்கப்படுகிறது.
தற்போது, அவன் மீண்டும் இயங்கி வருவதாக உளவுத்துறை கண்காணிப்பு உறுதிப்படுத்தியுள்ளது. பாகிஸ்தானின் பஹாவல்பூரில் இருந்து சுமார் 1,000 கி.மீ. தொலைவில் அமைந்துள்ள கில்ஜித்-பல்திஸ்தான் பகுதியில் அவனை கண்டறிந்துள்ளதாகவும், குறிப்பாக ஸ்கர்டு பகுதியில் அவன் தங்கியிருப்பதாகவும் தகவல்கள் தெரிவிக்கின்றன. இந்த ஸ்கர்டு பகுதி, அரசுப் பணியாளர்களுக்கான ஓய்வு விடுதிகள் மற்றும் மசூதிகள் அதிகம் உள்ள இடமாகும்.
இதற்கு முன்பு, பாகிஸ்தானின் முன்னாள் வெளியுறவு அமைச்சர் பிலாவல் புட்டோ ஜர்தாரி, “மசூத் அசார் பாகிஸ்தான் மண்ணில் இல்லை; இருந்தால் உடனடியாக கைது செய்து இந்தியாவிடம் ஒப்படைப்போம்,” என கூறியிருந்தார். ஆனால் தற்போதைய உளவுத்துறை தகவல்கள், பாக் ஆக்கிரமிப்பு பகுதிகளில் அவன் இருப்பதை உறுதி செய்கின்றன.
இந்த தகவல்களைத் தொடர்ந்து, இந்தியா மேலும் நடவடிக்கைகள் எடுக்க வாய்ப்பு உள்ளதாக எதிர்பார்க்கப்படுகிறது.
