தமிழக அரசியல் களம் தற்போது வார்த்தைப் போர்களால் அதிரத் தொடங்கியுள்ளது. அண்மையில் நடைபெற்ற விழாவில் அதிமுகவை ஊழல் கட்சி என மீண்டும் விமர்சித்த தமிழக வெற்றிக் கழகத் தலைவர் விஜய்க்கு, அதிமுகவின் பொருளாளரும் முன்னாள் அமைச்சருமான திண்டுக்கல் சி.சீனிவாசன் மிகக் கடுமையான பதிலடியைக் கொடுத்துள்ளார். ஊழல் பற்றிப் பேச விஜய்க்கு எந்தத் தகுதியும் இல்லை என்பதைச் சுட்டிக்காட்டும் வகையில் அமைந்த அவரது பேச்சு, அரசியல் வட்டாரத்தில் பெரும் பரபரப்பை ஏற்படுத்தியுள்ளது.
செய்தியாளர்களிடம் பேசிய திண்டுக்கல் சீனிவாசன், “அதிமுகவை ஊழல் கட்சி என்று தொடர்ந்து முத்திரை குத்தி வரும் விஜய், முதலில் தன்னைச் சுயபரிசோதனை செய்து கொள்ள வேண்டும். தான் ஒரு ஊழல்வாதி இல்லை என்பதை விஜய் முதலில் மக்கள் மன்றத்தில் நிரூபிக்கட்டும், அதன் பிறகு அதிமுகவைப் பற்றிப் பேசட்டும்” என்று ஆவேசமாகத் தெரிவித்தார். மேலும், விஜய்யின் தொழில்முறை வருமானம் குறித்துக் கேள்வி எழுப்பிய அவர், “திரைப்படங்களில் நடிப்பதற்காக நீங்கள் வாங்கும் கோடிக்கணக்கான சம்பளம் நியாயமானதா? அந்தச் சம்பளம் எப்படி நிர்ணயிக்கப்படுகிறது?” என்று நேரடியாகவே விஜய்க்குச் சவால் விடுத்தார்.
தொடர்ந்து பேசிய அவர், அதிமுகவிலிருந்து விலகி விஜய்யின் கட்சியில் இணைந்துள்ள கே.ஏ.செங்கோட்டையன் குறித்துக் குறிப்பிடுகையில், “செங்கோட்டையனைப் பற்றி விஜய் முழுமையாகத் தெரிந்து கொள்ள வேண்டும்; அதிமுகவின் வளர்ச்சிக்கும் தொண்டர்களுக்கும் இக்கட்சி செய்துள்ள தியாகங்களை உணராமல் பேசுவது முறையல்ல” என்றார். ஊழல் குற்றச்சாட்டுகளைக் சுமத்துவதற்கு முன்னால் தனது நிலைப்பாட்டைத் தெளிவுபடுத்த வேண்டியது விஜய்யின் கடமை என்று குறிப்பிட்ட அவர், அதிமுக ஒரு பேரியக்கம் என்பதையும் அதன் மக்கள் நலப்பணிகளையும் யாராலும் மறைக்க முடியாது என்றும் உறுதிபடத் தெரிவித்தார். விஜய்யின் அரசியல் வருகைக்கும் அவரது அடுக்கடுக்கான விமர்சனங்களுக்கும் அதிமுக தரப்பிலிருந்து வந்துள்ள இந்த நேரடித் தாக்குதல், வரும் தேர்தல் களம் இன்னும் அனல் பறக்கும் என்பதை உறுதி செய்துள்ளது.