சென்னை: பீகார் சட்டசபை தேர்தலில் என்.டி.ஏ கூட்டணி பெற்ற பெரும்பான்மையால், அதே அரசியல் நிலை தமிழகத்திலும் உருவாகும் எனவும், காங்கிரஸ் கட்சியை மக்கள் நிராகரிக்கத் தொடங்கியுள்ளதாகவும் பாஜக எம்.எல்.ஏ வானதி சீனிவாசன் தெரிவித்தார்.
பீகார் சட்டசபை தேர்தல் முடிவில், 243 தொகுதிகளில் 202 இடங்களை என்.டி.ஏ கைப்பற்றிய நிலையில், காங்கிரஸ்–ஆர்ஜேடி கூட்டணி வெறும் 35 தொகுதிகளையே வென்றது. இதில் காங்கிரஸ் கட்சி போட்டியிட்ட 61 இடங்களில் ஆறு வெற்றிகளையே பெற்றது. இந்த முடிவு காங்கிரசுக்கான பெரிய பின்னடைவாக பார்க்கப்படுகிறது.
இந்த வெற்றியை முன்னிட்டு சென்னை கமலாலயத்தில் பாஜக தொண்டர்கள் இனிப்பு வழங்கி கொண்டாடினர். இதில் வானதி சீனிவாசன் மற்றும் கரு நாகராஜன் உள்ளிட்டோர் கலந்து கொண்டனர்.
பின்னர் செய்தியாளர்களிடம் பேசிய வானதி சீனிவாசன் கூறியதாவது :
“பீகார் மக்களின் தீர்மானம், வளர்ச்சியும் பாதுகாப்பும் முக்கியம் என்பதைக் காட்டுகிறது. பெண்கள் பெருமளவில் என்.டி.ஏ கூட்டணிக்கு வாக்களித்துள்ளனர். இந்த மனநிலை தமிழகம், புதுச்சேரி, கேரளா, அசாம், மேற்கு வங்கம் போன்ற இடங்களிலும் பிரதிபலிக்கும்.”
“காங்கிரஸ் கட்சி மக்களின் உணர்வுகளிலிருந்து விலகி இருக்கிறது. ராகுல் காந்தியின் பிரசாரம் எங்கும் தாக்கம் ஏற்படுத்தவில்லை. பீகாரில் இந்த பிரச்சாரத்துக்கு எதிர்ப்பு அதிகமாக இருந்தது; அதன் விளைவாகவே காங்கிரஸ் கூட்டணி தோல்வியை சந்தித்தது. தமிழகத்திலும் இந்நிலை வேறுபடாது.”
பெண்களின் அரசியல் பங்கு குறித்து வானதி சீனிவாசன் குறிப்பிட்டதாவது:
“பீகாரில் பெண்கள் மாற்றத்தை உருவாக்கியுள்ளனர். அதுபோல தமிழக பெண்களும் தங்களின் பாதுகாப்பிற்காக என்.டி.ஏ ஆட்சியை விரும்புகிறார்கள். அதனால் அடுத்த தேர்தலில் பாஜக கூட்டணிக்கு வாக்குகள் நிச்சயம் அதிகரிக்கும்.”
அவர் முடிவில், பீகார் போன்ற அரசியல் மாற்றம் தமிழகத்திலும் நிச்சயம் நடைபெறும் என நம்பிக்கை தெரிவித்தார்.