தமிழக முதலமைச்சர் மு.க. ஸ்டாலின் அவர்களின் 73-வது பிறந்தநாளை முன்னிட்டு, கரூர் மாவட்டம் முழுவதும் திமுக சார்பில் பிரம்மாண்ட நலத்திட்ட உதவிகள் வழங்கும் விழாக்கள் நடைபெற்று வருகின்றன. இதன் தொடக்கமாக, கரூர் மாநகராட்சி 47-வது வார்டுக்கு உட்பட்ட கோடங்கிப்பட்டி பகுதியில் நடைபெற்ற நிகழ்ச்சியில் முன்னாள் அமைச்சர் வி.செந்தில் பாலாஜி கலந்துகொண்டு, பொதுமக்களுக்கு சில்வர் அண்டா உள்ளிட்ட வீட்டு உபயோகப் பொருட்களை வழங்கிப் பணிகளைத் தொடங்கி வைத்தார்.
இந்த விழாவின் போது செய்தியாளர்களிடம் பேசிய வி.செந்தில் பாலாஜி, “முதலமைச்சரின் பிறந்தநாளை முன்னிட்டு கரூர் மாவட்டத்திலுள்ள கரூர், அரவக்குறிச்சி, கிருஷ்ணராயபுரம் மற்றும் குளித்தலை ஆகிய 4 சட்டமன்றத் தொகுதிகளிலும் உள்ள சுமார் 3.30 லட்சம் குடும்ப அட்டைதாரர்களுக்கும் பயனுள்ள நலத்திட்ட உதவிகள் வழங்கப்பட உள்ளன. இந்தப் பணிகள் அனைத்தும் இன்னும் ஒரு வார காலத்திற்குள் மாவட்டம் முழுவதும் முழுமையாக நிறைவடையும்,” என்று தெரிவித்தார். இந்த நிகழ்ச்சியில் கரூர் மாநகராட்சி துணை மேயர் ப.சரவணன் உள்ளிட்ட முக்கிய நிர்வாகிகள் உடனிருந்தனர்.
எதிர்வரும் தேர்தல் களம் குறித்துப் பேசிய அவர், “2021-ம் ஆண்டு தேர்தலை விடவும் இந்த முறை கரூர் மாவட்டத்தின் நான்கு தொகுதிகளிலும் திமுக மிகப்பெரிய வாக்கு வித்தியாசத்தில் வெற்றி பெறும். கூட்டணி கட்சிகளுக்கு உரிய மரியாதையை அளிப்பதில் இந்தியாவிலேயே சிறந்த ஆளுமையாக நமது முதலமைச்சர் திகழ்கிறார். சில நேரங்களில் மாற்றுக் கருத்துக்கள் எழுந்தாலும், தோழமை உணர்வோடு அனைவரையும் அரவணைத்துச் செல்வதே அவரது சிறப்பு. எதிர்க்கட்சிகளான அதிமுகவும், பாஜகவும் தங்களின் இருப்பைக் காட்டிக்கொள்வதற்காகவே வீணான விமர்சனங்களை முன்வைக்கின்றனர்,” எனச் சாடினார்.
மேலும், களப்பணிகள் குறித்து விளக்குகையில், “கரூர் மாவட்டத்தில் உள்ள 1,111 வாக்குச் சாவடிகளிலும் ‘வெல்லும் தமிழ் பெண்கள்’ திட்டத்தின் கீழ் மகளிர் தொண்டர்கள் வீடு வீடாகச் சென்று அரசின் சாதனைகளையும், திட்டங்களையும் மக்களிடம் கொண்டு சேர்த்து வருகின்றனர். இந்த அபாரமான மக்கள் ஆதரவின் மூலம், தமிழகம் முழுவதும் 200-க்கும் அதிகமான தொகுதிகளில் வெற்றி பெற்று, இரண்டாவது முறையாக மு.க. ஸ்டாலின் அவர்கள் மீண்டும் முதலமைச்சராகப் பொறுப்பேற்பார் என்பது உறுதி,” என மிகுந்த நம்பிக்கையுடன் தெரிவித்தார். மாவட்டம் முழுவதும் கோலாகலமாகத் தொடங்கியுள்ள இந்தப் பரிசு வழங்கும் படலம், கரூர் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
