மகாராஷ்டிரா மாநிலத்தில் அரசாணையை வகித்து வரும் ஏக்நாத் ஷிண்டே தலைமையிலான சிவசேனாவின் எம்.எல்.ஏ.வாக இருந்துவரும் சஞ்சய் கெய்க்வாட், மீண்டும் ஒரு சர்ச்சைக்குரிய கருத்தினால் தலைப்புகளில் இடம்பிடித்துள்ளார்.
சமீபத்தில் மும்பையில் உள்ள ஒரு கேன்டீனில், உணவு ஊழியர் ஒருவரை தாக்கிய விவகாரம் பரபரப்பை ஏற்படுத்தியது. இந்த செயலுக்கு முதல்வர் ஏக்நாத் ஷிண்டே மற்றும் துணை முதல்வர் தேவேந்திர ஃபட்னாவிஸ் இருவரும் கண்டனம் தெரிவித்தனர். பின்னர், உணவு மற்றும் மருந்து நிர்வாகம் (FDA) உரிய நடவடிக்கையாக உணவகத்தின் தரத்தை ஆய்வு செய்து, அந்த இடத்தின் ஒப்பந்த உரிமத்தை ரத்து செய்தது.
இந்நிலையில், சஞ்சய் கெய்க்வாட், தனது செயலுக்கு மன்னிப்பு கேட்க மறுத்து, “இதே போன்ற சம்பவம் மீண்டும் நடந்தால், நான் மீண்டும் அதே வேலை செய்வேன்” என எச்சரித்ததுடன், உணவக ஒப்பந்தம் தென்னிந்தியரான ஷெட்டி என்பவருக்குப் பதிலாக ஒரு மராத்தி நபரிடம் கொடுக்க வேண்டுமெனக் கோரினார்.
அதையடுத்து அவர் கூறிய, “தென்னிந்தியர்கள் நடன பார்கள், பெண்கள் பார்களை நடத்தி மகாராஷ்டிராவின் கலாசாரத்தைக் கெடுக்கிறார்கள். அவர்கள் நம் குழந்தைகளைச் சீரழிக்கிறார்கள். அவர்கள் எப்படி நல்ல உணவை வழங்க முடியும்?” என்ற கருத்தும் பெரும் கண்டனத்தை உருவாக்கியுள்ளது.
மேலும், “கேண்டீன் ஊழியர் ஒரு மராத்தி நபராக இருந்திருந்தால் அவர் வேறுவிதமாக நடந்துகொண்டிருப்பாரா?” என்ற கேள்விக்கு பதிலளித்த கெய்க்வாட், “மராத்திகள் இதுபோன்று செய்யமாட்டார்கள். மகாராஷ்டிரா மக்கள் ஒருபோதும் நடனப் பார் நடத்தியதில்லை. இவை எல்லாம் வெளியாட்களால் தான் நடக்கிறது. முன்னதாக பாலாசாகேப் தாக்கரேவும் இதுபோன்றவற்றை எதிர்த்தார்” என்றார்.
புல்தானாவைச் சேர்ந்த கெய்க்வாட், இதுவரை இரண்டு முறை சட்டமன்ற உறுப்பினராக தேர்ந்தெடுக்கப்பட்டுள்ளார். அவர் முன்பும் பல்வேறு சர்ச்சைகளில் சிக்கியுள்ளார். கடந்த ஆண்டு, ராகுல் காந்தியின் நாக்கை வெட்டுபவர்களுக்கு ரூ.11 லட்சம் பரிசு அறிவித்ததும், தனது காருக்குள் வாந்தி எடுத்ததை போலீஸாரிடம் சுத்தம் செய்ய வைத்த வீடியோ வைரலானதுமே அவர் மீது கடும் விமர்சனங்களை ஏற்படுத்தியன. அதேபோல், 1987ஆம் ஆண்டு ஒரு புலியை வேட்டையாடி அதன் பல்லை கழுத்தில் அணிந்ததாகப் புகழ்ந்ததும் அவர் மீது எழுந்துள்ள பழைய சர்ச்சைகளில் ஒன்றாகும்.
