தமிழகத்தில் பரஸ்பர விருப்பத்தின் அடிப்படையில் நடைபெறும் காதல் திருமணங்கள், பெற்றோரின் எதிர்ப்பால் போக்சோ வழக்குகளாக மாற்றப்படும் போக்கு அதிகரித்து வருவது குறித்து சென்னை உயர்நீதிமன்ற மதுரை அமர்வு கடும் கவலை தெரிவித்துள்ளது. கன்னியாகுமரி மாவட்டம் நாகர்கோவிலைச் சேர்ந்த மகேஷ் என்பவர், தனது நண்பரின் சகோதரியைக் காதலித்துத் திருமணம் செய்துகொண்ட விவகாரத்தில், பெண் வீட்டார் அளித்த புகாரின் பேரில் அவர் மீது போக்சோ சட்டத்தின் கீழ் வழக்குப் பதிவு செய்யப்பட்டது. கடந்த 2018-ஆம் ஆண்டு மார்ச் மாதம் நடைபெற்ற இச்சம்பவத்தில், பாதிக்கப்பட்டதாகக் கூறப்படும் பெண்ணிற்கு அப்போது 16 வயது மட்டுமே என்று கூறி, நாகர்கோவில் அனைத்து மகளிர் காவல் நிலையப் போலீஸார் மகேஷைக் கைது செய்தனர். இந்த வழக்கை விசாரித்த நாகர்கோவில் போக்சோ சிறப்பு நீதிமன்றம், மகேஷிற்கு 20 ஆண்டுகள் கடுங்காவல் தண்டனை விதித்து அதிரடித் தீர்ப்பளித்தது.
இந்தத் தண்டனையை எதிர்த்து மகேஷ் தரப்பில் உயர்நீதிமன்ற மதுரை அமர்வில் மேல்முறையீடு செய்யப்பட்டது. இந்த மனுவை விசாரித்த நீதிபதி மாலா, வழக்கின் ஆதாரங்களை ஆய்வு செய்தபோது முக்கியக் குறைபாடுகளைச் சுட்டிக்காட்டினார். குறிப்பாக, பாதிக்கப்பட்ட பெண்ணின் வயதை நிரூபிக்கத் தாக்கல் செய்யப்பட்ட பிறப்புச் சான்றிதழ் மற்றும் மாற்றுச் சான்றிதழ் ஆகியவை அசல் ஆவணங்களாக இல்லாமல் நகல்களாக மட்டுமே இருந்தன. அசல் ஆவணங்கள் கைவசம் இருந்தும் அவை நீதிமன்றத்தில் சமர்ப்பிக்கப்படாத நிலையில், வெறும் நகல்களைச் சட்டப்பூர்வ ஆதாரமாக ஏற்க முடியாது என நீதிபதி திட்டவட்டமாகத் தெரிவித்தார். பெண்ணின் வயது சட்டப்பூர்வமாக நிரூபிக்கப்படாத நிலையில், போக்சோ சட்டத்தின் கீழ் சுமத்தப்பட்ட குற்றச்சாட்டுகள் செல்லாது எனக் கூறி, கீழமை நீதிமன்றம் விதித்த 20 ஆண்டு தண்டனையை ரத்து செய்து மகேஷை உடனடியாக விடுதலை செய்ய உத்தரவிட்டார்.
இந்தத் தீர்ப்பின் போது நீதிபதி வெளியிட்ட கருத்துக்கள் சமூகத்தில் பெரும் விவாதத்தை ஏற்படுத்தியுள்ளன. “இளம் பெண்கள் மற்றும் இளைஞர்களுக்கு இடையே ஒருமித்த கருத்துடன் நடைபெறும் காதல் திருமணங்கள், பெற்றோரின் தலையீட்டிற்குப் பிறகு போக்சோ வழக்குகளாக மாற்றப்படுகின்றன. இதனால் இளைஞர்கள் தங்களது வாழ்நாளின் நீண்ட காலத்தைச் சிறையில் கழிக்க நேரிடுவது மிகுந்த வேதனையளிக்கிறது” என்று நீதிபதி குறிப்பிட்டார். மேலும், போக்சோ சட்டத்தின் தீவிரத்தன்மை மற்றும் அதன் விளைவுகள் குறித்துப் பொதுமக்கள், குழந்தைகள் மற்றும் பெற்றோருக்குப் போதிய விழிப்புணர்வை ஏற்படுத்த வேண்டியது காலத்தின் கட்டாயம் என்றும் அவர் வலியுறுத்தினார். இது தொடர்பாகத் தமிழக அரசின் முதன்மைச் செயலர் எடுத்த நடவடிக்கைகள் குறித்து அறிக்கை தாக்கல் செய்ய உத்தரவிட்டு, வழக்கை வரும் ஜூன் 3-ஆம் தேதிக்கு நீதிமன்றம் தள்ளிவைத்துள்ளது.
